सीमभन्ज्याङ बजार अनिश्चतकालका लागि बन्द

फाेटाे : विनाेदकुमार लामा

कोरोना भाइरस संक्रमणको डरले मकवानपुरको थाहा नगरपालिका–४ स्थित सीमभन्ज्याङ बजार अनिश्चितकालका लागि भएकोे छ । स्थानीय व्यवसायीहरुले कोरोना संक्रमण फैलनसक्ने भन्दै स्वतः स्फूर्त रुपमा व्यवसाय बन्द गरेका हुन् ।

मकवानपुरको दिनहुँ कोरोना संक्रमितहरुको संख्या बढ्दै जाँदा त्रास फैलिएको छ । त्रिभुवन राजपथअन्तर्गत थाहा नगरपालिका भित्रिने मुख्य नाका भएको र  उक्त राजपथ भएर आवतजावत गर्ने सवारी साधनहरु रोकेर चहलपहल भैरहने भएकोले कोरोनाको कारण व्यवसाय बन्द गर्ने निष्कर्षमा पुगेको स्थानीय होटल व्यवसायी सीताराम सिन्तानले बताउनुभयो ।

कोरोना संक्रमण रोकथामका दृष्टिले बजारलाई कसरी व्यवस्थित गर्न सकिन्छ भन्ने सम्बन्धमा सीमभन्ज्याङ बजार व्यवस्थापन समितिले छलफलको आयोजना गर्दा स्थानीय व्यवसायीहरुले परिस्थिति सामान्य नहुन्जेल व्यवसाय नै बन्द गर्ने निर्णय गरेको समितिका अध्यक्ष अमित पाख्रिनले बताउनुभयो । 

सीमभन्ज्याङ त्रिभुवन राजपथकै निकै पुरानो बजार मानिन्छ । मकवानपुरको सबैभन्दा उच्च स्थानमा रहेको यो बजार विशेषगरी सेलरोटी र तरकारी(खाजा)ले प्रशिद्ध छ । त्रिभुवन राजपथ भएर आवतजावत गर्ने सवारी चालकहरु सीमभन्ज्याङमा रोकेर खाजा र खाना खाएर जाने गर्दछन् ।

सीमभन्ज्याङ बागमती प्रदेश राजधानी हेटौंडादेखि ५० किलोमिटर उत्तरतर्फ पर्दछ । यहाँ साना तथा मझौला गरी एक दर्जनभन्दा बढी होटलहरु रहेका छन् ।