थाहा नगरका उपप्रमुख भरत गोपाली अन्तर्राष्ट्रिय आइकन अवार्डबाट सम्मानित

मकवानपुर । थाहा नगरपालिकाका उपप्रमुख भरत गोपाली अन्तर्राष्ट्रिय सम्मानबाट सम्मानित भएका छन्। गोपालीलाई ‘3rd Edition International Icon Award 2026’ अन्तर्गत ‘Best Contribution in Wellness & Spiritual Tourism’ विधामा अन्तर्राष्ट्रिय अवार्ड प्रदान गरिएको हो।
जीवन विज्ञान, स्वास्थ्य, आध्यात्मिकता तथा धार्मिक पर्यटनको प्रवर्द्धन र विकासमा पुर्‍याएको योगदानको मूल्याङ्कन गर्दै गोपालीलाई उक्त सम्मान प्रदान गरिएको आयोजकले जनाएको छ।
विशेष समारोहमा जनमत पार्टीका अध्यक्ष डा. सीके राउत प्रमुख अतिथिका रूपमा सहभागी थिए। कार्यक्रममा विभिन्न क्षेत्रका व्यक्तित्व तथा विशिष्ट अतिथिहरूको सहभागिता रहेको थियो। सोही समारोहमा प्रमुख अतिथि डा. राउतको हातबाट उपप्रमुख गोपालीले अवार्ड ग्रहण गरेका थिए।
सम्मान ग्रहण गर्दै गोपालीले अन्तर्राष्ट्रिय सम्मानले सामाजिक सेवा, धार्मिक तथा आध्यात्मिक पर्यटनको प्रवर्द्धन र स्थानीय विकासका क्षेत्रमा थप सक्रिय भएर काम गर्न आफूलाई प्रेरणा मिलेको बताए।
थाहा नगरपालिकाका धार्मिक, सांस्कृतिक तथा पर्यटकीय क्षेत्रलाई राष्ट्रिय तथा अन्तर्राष्ट्रियस्तरमा चिनाउने उद्देश्यले आफूले निरन्तर काम गर्दै आएको गोपालीको भनाइ छ। स्थानीय धार्मिक तथा आध्यात्मिक महत्वका क्षेत्रको संरक्षण, प्रवर्द्धन र प्रचार–प्रसारमार्फत पर्यटन विकासमा योगदान पुर्‍याउने प्रयासलाई सम्मानले थप हौसला दिएको उनले बताए।
प्राकृतिक सौन्दर्यसँगै धार्मिक तथा आध्यात्मिक पर्यटनको सम्भावना बोकेको थाहा नगरपालिकामा विभिन्न धार्मिकस्थल, मठमन्दिर, सांस्कृतिक सम्पदा तथा पर्यटकीय गन्तव्य रहेका छन्। ती क्षेत्रको व्यवस्थित संरक्षण र प्रवर्द्धन गर्न सके आन्तरिक तथा बाह्य पर्यटक आकर्षित गर्न सकिने अपेक्षा गरिएको छ।
‘Best Contribution in Wellness & Spiritual Tourism’ विधामा गोपालीले प्राप्त गरेको सम्मानले थाहा नगरपालिकाको धार्मिक तथा आध्यात्मिक पर्यटनको सम्भावनालाई राष्ट्रिय तथा अन्तर्राष्ट्रियस्तरमा थप चिनाउन सहयोग पुग्ने अपेक्षा गरिएको छ।