थाहा–१० बिसिङ्खेलमा दुई मोटरसाइकल ठोक्किँदा चार जना घाइते

थाहा । मकवानपुरको थाहा नगरपालिका–१० बिसिङ्खेलस्थित गणेशमान सिंह सडकखण्डमा दुई मोटरसाइकल एकआपसमा ठोक्किँदा चार जना घाइते भएका छन्।
इलाका प्रहरी कार्यालय पालुङका अनुसार शनिबार (कात्तिक २८ गते) दिउँसो करिब ४ः४० बजे चित्लाङबाट बिसिङ्खेलतर्फ जाँदै गरेको बा.प्र.०२–०६४ प ३६५२ नम्बरको बुलेट मोटरसाइकल र विपरीत दिशाबाट आउँदै गरेको बा.प्र.०२–०६५ प २६०३ नम्बरको एनएस मोटरसाइकल एकआपसमा ठोक्किएका थिए।
दुर्घटनामा बुलेट मोटरसाइकल चालक थाहा नगरपालिका–९ नारायणहिटी निवासी ४५ वर्षीय सुरेन्द्र मोहन बलामी घाइते भएका छन्। उनको दाहिने खुट्टा, हात र बायाँ आँखामा चोट लागेको छ।
त्यस्तै, एनएस मोटरसाइकल चालक थाहा नगरपालिका–७ निवासी १५ वर्षीय समिर गोले, मोटरसाइकलमा सवार उनकी १३ वर्षीया बहिनी शलिना गोले र पछाडि सवार काभ्रेपलाञ्चोकको रोशी गाउँपालिका–१२ निवासी १७ वर्षीया सोनिका स्याङ्तान घाइते भएका छन्।
प्रहरीका अनुसार चारै जनाको अवस्था मध्यम रहेको छ। घाइतेहरूलाई सुरुमा स्थानीय इरा क्लिनिकमा उपचारका लागि लगिएको थियो। सामान्य उपचारपछि थप उपचारका लागि साँझ ५ः१० बजे काठमाडौंस्थित शिक्षण अस्पताल पठाइएको इलाका प्रहरी कार्यालय पालुङले जनाएको छ।