इतिहास र पर्यटन जोड्दै थानकोट–चित्लाङ क्रसकन्ट्री दौड सम्पन्न, धर्म महर्जन बने विजेता

थाहा  ऐतिहासिक थानकोटदेखि पर्यटकीय गन्तव्य चित्लाङसम्म आयोजना गरिएको थानकोट–चित्लाङ १० माइल क्रसकन्ट्री दौड प्रतियोगिता सम्पन्न भएको छ।

आज सम्पन्न प्रतियोगितामा कीर्तिपुरका धावक धर्म महर्जनले निर्धारित दूरी १ घण्टा १५ मिनेटमा पूरा गर्दै प्रथम स्थान हासिल गरेका छन्।

बैकुण्ठ मानन्धर खेलकुद नेपालको आयोजनामा शनिबार सम्पन्न प्रतियोगिता चन्द्रागिरि नगरपालिका–४ स्थित ऐतिहासिक थानकोट कोतघरबाट सुरु भई मकवानपुरको थाहा नगरपालिका–९, चित्लाङ पुगेर टुंगिएको थियो। करिब १६ किलोमिटर दूरीको प्रतियोगितामा २५० भन्दा बढी धावक सहभागी भएका थिए।
प्रतियोगितामा सहभागी हुन पुगेका धावकहरू थानकोटस्थित साझा घरमा भेला भएका थिए। त्यसपछि स्थानीय बाजागाजासहित थानकोट क्षेत्रको परिक्रमा गर्दै धावकहरूलाई स्वागत गरिएको थियो। परिक्रमाका क्रममा स्थानीयवासीले ठाउँठाउँमा गाग्री राखेर, खादा ओढाएर तथा स्थानीय बुहारी समूहले टीका लगाएर धावकहरूको स्वागत तथा सम्मान गरेका थिए।
थानकोटको कोतघरबाट सुरु भएको दौडमा सहभागी धावकहरूले चन्द्रागिरिको उकालो–ओरालो, घुम्ती तथा चुनौतीपूर्ण भौगोलिक मार्ग पार गर्दै चित्लाङसम्मको यात्रा पूरा गरेका थिए।
प्रतियोगिताको समापनस्थलमा थाहा नगरपालिकाका नगर प्रमुख बिष्णु विष्ट, वडा नम्बर ९ का अध्यक्ष तथा चन्द्रागिरि नगरपालिका वडा नम्बर ४ का अध्यक्षलगायत जनप्रतिनिधिहरूले धावकहरूलाई स्वागत गरेका थिए।
प्रतियोगितामा प्रथमदेखि पाँचौँ स्थानसम्म हासिल गर्ने धावकहरूलाई नगद पुरस्कार तथा सम्मानपत्र प्रदान गरी पुरस्कृत गरिएको थियो।
यस प्रतियोगितालाई करिब २४ वर्षअघिको ऐतिहासिक दौडको निरन्तरताका रूपमा समेत लिइएको छ। यसअघि आयोजित दौडमा मुगुका कीर्तिमानी धावक अक्कलबहादुर बोहरा प्रथम भएका थिए। आफ्नो खेलजीवनको सुरुवाती उपलब्धिसँग जोडिएको प्रतियोगितालाई पुनः निरन्तरता दिइएकोमा खुसी व्यक्त गर्दै बोहराले यसपटक खेलाडीको प्रोत्साहनका लागि १० हजार रुपैयाँ सहयोगसमेत गरेका थिए ।
खेलकुदलाई इतिहास, संस्कृति र पर्यटनसँग जोड्ने उद्देश्यले आयोजना गरिएको प्रतियोगिताले चन्द्रागिरि र थाहा नगरपालिकाबीचको सामाजिक, धार्मिक तथा सांस्कृतिक सम्बन्धलाई थप प्रगाढ बनाउने अपेक्षा गरिएको छ।
विशेषगरी थानकोट–चन्द्रागिरि–चित्लाङ क्षेत्रको प्राकृतिक सौन्दर्य, ऐतिहासिक सम्पदा र पर्यटकीय सम्भावनालाई खेलकुदमार्फत राष्ट्रियस्तरमा चिनाउन प्रतियोगिताले योगदान पुर्‍याउने विश्वास रहेको आयोजकले जनाएको छ ।