करदातालाई सहज सेवा प्रवाह गर्न थाहानगर उद्योग वाणिज्य संघद्वारा तीनदिने कर शिविर

थाहा, मकवानपुर ।
थाहानगर उद्योग वाणिज्य संघले उद्योगी, व्यवसायी तथा करदातालाई सहज, छिटो र प्रभावकारी सेवा प्रदान गर्ने उद्देश्यले २०८३ साल श्रावण २०, २१ र २२ गते तीनदिने कर शिविर सञ्चालन गर्ने भएको छ। शिविर बिहान १०:०० बजेदेखि दिउँसो ४:०० बजेसम्म संघको कार्यालय, शिखरकोटमा सञ्चालन हुनेछ।
थाहानगर उद्योग वाणिज्य संघको आयोजना तथा आन्तरिक राजस्व कार्यालय, हेटौंडा र थाहा नगरपालिकाको समन्वय एवं सहयोगमा सञ्चालन हुने शिविरमा आय विवरण भर्ने, कर दाखिला, अनलाइन कर नवीकरण, नयाँ व्यवसाय दर्ता, कारोबार थपघट, व्यवसाय नवीकरणलगायतका सेवा एकै स्थानबाट प्रदान गरिने जनाइएको छ।
थाहानगर उद्योग वाणिज्य संघका अध्यक्ष पुरुषोत्तम ढकालले संघले स्थापना कालदेखि नै व्यवसायी तथा करदाताको हितलाई प्राथमिकतामा राख्दै प्रत्येक वर्ष यस्ता सेवा–मुखी कार्यक्रम सञ्चालन गर्दै आएको बताउनुभयो। उहाँले करदातालाई सम्बन्धित कार्यालयसम्म पटक–पटक धाउनुपर्ने अवस्थाको अन्त्य गर्दै आवश्यक सेवा आफ्नै नगरमा उपलब्ध गराउने उद्देश्यले कर शिविर सञ्चालन गरिएको उल्लेख गर्नुभयो। सबै उद्योगी, व्यवसायी तथा करदाताले यो अवसरको अधिकतम उपयोग गर्न उहाँले आग्रह गर्नुभयो।
संघका महासचिव जर्म श्रेष्ठले कर तथा व्यवसायसम्बन्धी आवश्यक काम बाँकी रहेका सम्पूर्ण उद्योगी, व्यवसायी तथा करदातालाई तोकिएको मिति र समयमा आवश्यक कागजातसहित अनिवार्य रूपमा शिविरमा उपस्थित हुन अनुरोध गर्नुभयो। उहाँले समयमै कर तथा व्यवसायसम्बन्धी प्रक्रिया पूरा नगर्दा जरिवाना तथा अन्य प्रशासनिक झन्झट व्यहोर्नुपर्ने अवस्था आउन सक्ने भएकाले शिविरलाई प्रभावकारी रूपमा उपयोग गर्न आग्रह गर्नुभयो।
संघका अनुसार प्रत्येक वर्ष सञ्चालन हुँदै आएको कर शिविर ले करदातालाई स्थानीय स्तरमै गुणस्तरीय सेवा प्रदान गर्दै आएको छ। यस वर्षको शिविरबाट समेत सयौं उद्योगी, व्यवसायी तथा करदाताले प्रत्यक्ष लाभ लिने अपेक्षा गरिएको छ।