मकवानपुरको थाहा नगरपालिका–२ अंगारेका युवा समाजसेवी माधव कार्कीले थाहाका विभिन्न मठमन्दिरको संरक्षण, पुनर्निर्माण तथा सौन्दर्य अभिवृद्धिमा उल्लेखनीय योगदान पुर्याउँदै आएका छन्। धार्मिक तथा सांस्कृतिक सम्पदाको संरक्षणलाई पारिवारिक परम्पराका रूपमा निरन्तरता दिँदै आएका कार्कीले विभिन्न मन्दिरमा देवीदेवताका मूर्ति स्थापना, घण्ट तथा पित्तलका पाता चढाउनेदेखि मन्दिर पुनर्निर्माणमा सहयोग गर्ने प्रतिबद्धतासमेत जनाएका छन्।
कार्की परिवारको धार्मिक योगदानको इतिहास करिब एक शताब्दी पुरानो छ। विसं १९९२ मा उनका पुर्खा मेहर सिंह कार्कीले पाण्डुकेश्वर महादेव मन्दिरमा बसाहको मूर्ति चढाएर सुरु गरेको धार्मिक योगदानको परम्परालाई नाति माधव कार्कीले निरन्तरता दिइरहेका छन्। बाजे गम्भीर सिंह कार्कीका सन्तान जसिमन्त र शिवहरीको पुस्तासँग जोडिएको यस परिवारले धार्मिक तथा सांस्कृतिक सम्पदाको संरक्षणमा लामो समयदेखि योगदान दिँदै आएको छ।
पाण्डुकेश्वर महादेव मन्दिरमा उल्लेखनीय योगदान
थाहा नगरपालिकाको धार्मिक आस्थाको केन्द्र तथा चौसट्ठी ज्योतिर्लिङ्गका रूपमा परिचित पाण्डुकेश्वर महादेव मन्दिरमा कार्की परिवारले विभिन्न देवीदेवताका मूर्ति स्थापना गरेको छ। परिवारले मन्दिर परिसरमा नवदुर्गाका मूर्तिसहित भगवान् विष्णुका दश अवतारका शिलाका मूर्तिसमेत प्रतिस्थापन गरेको हो।
त्यसैगरी, मन्दिरको उत्तरतर्फ रहेको लामो पर्खालमा २१ वटा देवीदेवताका मूर्ति स्थापना गरिएको छ। माधव कार्कीसहित परिवारले मन्दिरमा सालिक, विभिन्न मूर्ति तथा घण्ट चढाएर धार्मिक स्थलको महत्त्व र सौन्दर्य बढाउन योगदान पुर्याएका छन्।
इन्द्रायणी मन्दिरमा मूर्तिदेखि पित्तलको पातासम्म
पालुङस्थित इन्द्रायणी माईको मन्दिरमा पनि कार्की परिवारको योगदान उल्लेखनीय छ। परिवारले यसअघि इन्द्रायणी देवीको वाहन सिंहको मूर्ति तथा मन्दिरको द्वारपालका रूपमा रहने ऐरावत हात्तीको मूर्ति स्थापना गरिसकेको छ।
हालै युवा समाजसेवी माधव कार्कीले मन्दिरभित्र पित्तलको पाता चढाएका छन्। धार्मिक तथा सांस्कृतिक सम्पदाको संरक्षण र मन्दिरको सौन्दर्य अभिवृद्धि गर्ने उद्देश्यले उनले उक्त कार्य गरेका हुन्।
मन्दिरको माथिल्लो भागमा रहेको करिब २० मिटर लामो ढुंगाको नागको आकृतिलाई समेत धातुले निर्माण तथा आवरण गर्ने प्रतिबद्धता कार्कीले व्यक्त गरेका छन्।
सेती गणेशदेखि कुलघर निर्माणसम्म
कार्कीले थाहा–३ गोपाली गाउँस्थित श्री सेती गणेश मन्दिरमा समेत पित्तलको पाता चढाएका छन्। यसका अतिरिक्त थाहा–२ अंगारेमा कार्की कुलघर निर्माणमा पनि उनले महत्त्वपूर्ण योगदान पुर्याएका छन्।
फाँटबजारस्थित पाथिभरा देवीको मन्दिर पुनर्निर्माणमा सहयोग गर्ने प्रतिबद्धतासमेत उनले जनाएका छन्। यसले धार्मिक आस्थाका केन्द्रहरूको संरक्षणसँगै स्थानीय कला, संस्कृति र परम्पराको निरन्तरतामा उनको चासो देखाउँछ।
धार्मिक सम्पदा संरक्षणमा पुस्तान्तरण
पुर्खाले सुरु गरेको धार्मिक सेवाको परम्परालाई नयाँ पुस्ताले निरन्तरता दिनु समाजका लागि प्रेरणादायी उदाहरण हो। माधव कार्की र उनको परिवारले विभिन्न मन्दिरमा पुर्याएको योगदानले धार्मिक स्थलको संरक्षण, सांस्कृतिक पहिचानको जगेर्ना र स्थानीय सम्पदाको सौन्दर्य अभिवृद्धिमा सहयोग पुर्याएको छ।
व्यक्तिगत तथा पारिवारिक पहलबाट मठमन्दिरको संरक्षणमा गरिएको यस्तो योगदानले स्थानीय समुदायमा धार्मिक सम्पदाप्रतिको अपनत्व बढाउनसमेत मद्दत पुग्ने अपेक्षा गरिएको छ।
