ग्रामीण पर्यटन व्यावसायिक सहकारी संस्थाको १६ औं वार्षिक साधारणसभा सम्पन्न

थाहा नगरपालिका–शिखरकोटस्थित विकास घरमा ग्रामीण पर्यटन व्यावसायिक सहकारी संस्था थाहा–३ को १६ औं वार्षिक साधारणसभा एक विशेष कार्यक्रमका बीच सम्पन्न भएको छ।
कार्यक्रमको अध्यक्षता संस्थाका अध्यक्ष शिवहरी बर्तौलाले गर्नु भएको थियो। सो अवसरमा संस्थाका संस्थापक अध्यक्ष सिताराम अधिकारी तथा पूर्व अध्यक्ष निरन्जन अधिकारी अतिथिका रूपमा उपस्थित थिए।
साधारणसभामा अध्यक्ष बर्तौलाले प्रस्तुत गर्नुभएको प्रतिवेदनमा सहकारीका शेयर सदस्यहरूका समस्या समाधानलाई प्राथमिकता दिने, बचत तथा ऋणमा समयअनुकूल ब्याजदर कायम गर्ने, पर्यटन उद्योगमा लगानी बढाउने, उत्तरी मकवानपुरका विभिन्न स्थानमा सदस्यता तथा सेवा विस्तार गर्ने र विभिन्न तालिम तथा गोष्ठी सञ्चालन गर्ने योजना समेटिएको थियो।
सचिव प्रदिप केसीले प्रस्तुत गरेको वार्षिक प्रतिवेदन अनुसार संस्थामा हाल ७७५ सदस्य, ५७ लाख २१ हजार रुपैयाँ शेयर पुजी, १ करोड ३० लाख रुपैयाँ ऋण लगानी, ४४ लाख ११ हजार रुपैयाँ बैंक मौज्दात र ६४ लाख १४ हजार रुपैयाँ बचत निक्षेप रहेको जानकारी दिइयो। साथै कोषाध्यक्ष दिपा थापा तथा लेखा समिति संयोजकले पनि आफ्ना–आफ्ना प्रतिवेदन प्रस्तुत गरे।
साधारणसभाले संस्थाका विभिन्न समितिहरूलाई पूर्णता दिने प्रस्ताव पारित गरेको छ।
कार्यक्रमको अवसरमा सहकारीमा उत्कृष्ट कारोबार गर्ने सदस्यहरूलाई नगद तथा सम्मानपत्रद्वारा सम्मान गरिएको थियो।
सम्मानित हुने सदस्यहरूः
• उत्कृष्ट बचत : श्यामकाजी गोपाली (थाहा–३), सन्तोष केसी (थाहा–३), शुष्मा राउत (थाहा–४)
• उत्कृष्ट कारोबार : शर्मीला भुजेल (थाहा–३), शोभा कुमारी केसी (थाहा–३)
• उत्कृष्ट बाल बचत : आयान्स वाइवा (थाहा–३)
• उत्कृष्ट विद्यार्थी बचत : स्वेता अधिकारी (थाहा–४)
• ज्येष्ठ नागरिक सम्मान : खम्बबहादुर अधिकारी (थाहा–४) र माइली अधिकारी लाई सम्मानित गरियो।
साधारणसभा सफलतापूर्वक सम्पन्न गर्दै अध्यक्ष बर्तौलाले सहकारीलाई आणखी सक्षम, पारदर्शी र सदस्य–मैत्री बनाउँदै लैजाने प्रतिबद्धता व्यक्त गर्नुभएको छ।