विङ्ग युथको आयोजनामा थाहाका कृषकका लागि ३ दिने आलु खेती तालिम सुरु

आलु खेतीको लागि देशमै प्रख्यात थाहा नगरपालिकाको कृषकहरूको क्षमता अभिवृद्धि र आलु उत्पादन बढाउने उद्देश्यले पालुङमा ३ दिने आलु खेती सम्बन्धी तालिम सुरु भएको छ।
थाहाको थानाबजारमा अवस्थित पालुङ बहुउद्देश्यीय सहकारीको सभा हलमा तालिम सुरु भएको हो।
विङ्ग युथको आयोजनामा सुरु गरिएको तालिममा राष्ट्रिय आलु तथा तरकारी बाली विकास केन्द्र, कीर्तिपुरको प्राविधिक सहयोग रहेको छ भने ONGD–FNEL ले सपोर्ट गरेको छ।

बिङ्ग युथका अध्यक्ष वसन्त कार्कीको अध्यक्षतामा सम्पन्न तालिम उद्घाटन समारोहमा  राष्ट्रिय आलु तथा तरकारी बाली विकास केन्द्रका प्रमुख पदम अधिकारीको प्रमुख आतिथ्यतामा तालिम उद्घाटन गरिएको हो।
तालिममा आलु विकास केन्द्रका प्रशिक्षक ज्ञानु थापा मगर र केन्द्रका प्रमुख पदम अधिकारीले सहजीकरण गरिरहनुभएको छ।

विङ्ग युथका फाइनान्सियल अफिसर पवन सिंह बस्नेतले स्वागत गरेको कार्यक्रममा थाहा नगरपालिकाका कृषि शाखा प्रमुख संजय तिवारी, सामाजिक विकास शाखा प्रमुख अनिल लामिछानेको उपस्थिति रहेको थियो।
तालिम ११ गतेसम्म सञ्चालन हुने विङ्ग युथकी कार्यक्रम संयोजक मनिषा बस्नेतले जानकारी दिनुभयो।
कृषकहरूमा रहेको आलु खेतीसम्बन्धी अनभिज्ञतालाई चिर्दै उत्पादन वृद्धि गर्ने उद्देश्यले तालिम सुरु गरिएको आयोजकले जनाएको छ।
तीन दिनसम्म चल्ने तालिममा जग्गा छनोटदेखि हावापानीअनुसारको बीउ छनोट, खाने आलु र बीउ आलुको भण्डारण तथा बजारीकरणसम्मको योजनाबारे कृषकहरूलाई व्यावहारिक ज्ञान प्रदान गरिने कार्यक्रम संयोजक मनिषा बस्नेतले बताउनुभयो।
तालिममा नगरपालिकाभित्रका १२ वटा वडाका २२ वटा कृषि समूहहरूको प्रतिनिधित्व हुने गरी कृषकहरूको उल्लेख्य सहभागिता रहेको छ।