थाहाको कृषि बिज्ञान केन्द्र झम्केश्वरीमा दुई दिने बाख्रापालन तथा व्यवस्थापन तालिम सुरु

कृषि तथा वन विज्ञान विश्वविद्यालय, अनुसन्धान तथा प्रसार निर्देशनालय, कृषि विज्ञान केन्द्र पालुङको आयोजनामा कृषकहरूको सीप तथा प्राविधिक क्षमता अभिवृद्धि गर्ने उद्देश्यले बाख्रापालन तथा व्यवस्थापन सम्बन्धी दुई दिने तालिम सुरु भएको छ।
कृषि तथा वन विज्ञान विश्वविद्यालय, अनुसन्धान तथा प्रसार निर्देशनालय, रामपुर चितवनको आयोजना तथा नेपाल कृषि अनुसन्धान परिषद् (नार्क) अन्तर्गत राष्ट्रिय पशु प्रजनन तथा आनुवंशिक अनुसन्धान केन्द्र, खुमलटार ललितपुरको सहकार्यमा सञ्चालन भएको तालिम आज थाहा नगरपालिका–१, ओखरबजारस्थित कृषि विज्ञान केन्द्रको सभाहलमा विधिवत् रूपमा उद्घाटन गरिएको हो।
तालिम थाहा नगरपालिका वडा नं. १, ४ र ५ का पशुपालक कृषकहरूलाई लक्षित गरी आयोजना गरिएको हो। बाख्रापालनमा देखिने समस्या, वैज्ञानिक व्यवस्थापन, रोग नियन्त्रण, पोषण व्यवस्थापन, प्रजनन प्रविधि तथा उत्पादन वृद्धि सम्बन्धी विषयमा सहभागी कृषकहरूलाई व्यवहारिक र प्राविधिक जानकारी प्रदान गरिने आयोजकले जनाएको छ।
तालिममा कृषि तथा वन विज्ञान विश्वविद्यालय, अनुसन्धान तथा प्रसार निर्देशनालयका निर्देशक प्राध्यापक डा. निराजन भट्टराईको विशेष उपस्थिती रहेको थियो। साथै,कार्यक्रममा  नार्क अन्तर्गत पशु तथा मत्स्य अनुसन्धान निर्देशनालयकी निर्देशक एवं प्रमुख वैज्ञानिक डा. नीना अमात्य गोर्खाली, वैज्ञानिक डा. सरोज सापकोटा तथा बरिष्ठ प्राविधिक अधिकृत भोजराज पोख्रेलले सहजीकरण गर्नुहुनेछ।
आयोजकका अनुसार, यस किसिमका तालिमहरूले स्थानीय कृषकहरूको उत्पादन क्षमता बढाउनुका साथै व्यावसायिक पशुपालनतर्फ आकर्षित गर्न महत्वपूर्ण भूमिका खेल्ने विश्वास लिइएको छ।