बल्छी खेल्न जाउँ न दाजै ईन्द्रसराेवर !

इन्द्रसरोवर गाउँपालिकामा अवस्थित इन्द्रसरोवर तालमा अशोज १० गते भोली देखि टिकट काटेर बल्छी खेल्न पाइने भएको छ । आन्तरिक तथा बाह्य पर्यटन प्रवद्धन गर्ने उदेश्यले इन्द्रसरोवर मत्स्य व्यवसायी संघले यस्तो व्यवस्था गर्न लागेको संघका अध्यक्ष गोपाल भ्लोनले बताउनुभयो । 

टिकटको मुुल्य स्थानीय व्यक्तिको लागि आधा दिनको रु.३ सय र पुरा दिनको रु. ५ सय तोकिएको छ भने बाह्य व्यक्तिको लागि आधा दिनको रु.५ सय र पुरा दिनको १ हजार रुपैँया  निर्धारण गरिएको छ । हालका लागि संघका कर्मचारीहरुलाई नै टिकट बिक्रीका लागि खटाइएको छ । संघले मार्खुको लागि कालिदेवीथान, गैरा, मार्खुचौर र चल्खुखोला क्षेेेत्र र कुलेखानीको लागि औलेटको क्षेत्रमा बल्छी खेल्न पाइने जनाएको छ । 

बिहान ७ बजेदेखि बेलुकी ५ बजे सम्म पुरा दिन र बिहान ७ बजेदेखि दिउँसो १ बजे सम्म आधा दिन निर्धारण गरिएको छ । हालको कोरोनाको महामारीको स्थितिमा भने सामाजिक दुरी, मास्क लगायतका स्वास्थ्यका मापदण्ड अपनाएर मात्र बल्छी खेल्न दिने भएको छ । यसरी बल्छी खेल्न दिँदा इन्द्रसरोवर आउने पर्यटकले बल्छी खेलेर रमाउन पाउने र व्यवसायी संघलाई आयआर्जनमा समेत टेवा पुग्ने भएको छ ।