पुरानै लयमा फर्कदै थाहानगरको पर्यटन

केही दिनदेखि मकवानपुरको उत्तरी क्षेत्रमा पर्ने मार्खु, चित्लाङ, थाहा नगरपालिकाको सिमभन्ज्याङ, दामन, पालुङ क्षेत्रमा पर्यटकको घुइँचो बढ्न थालेका छन् । पर्यटकको संख्या बढेसँगै होटल व्यवसायीहरु उत्साहित बनेका छन् । लामो समयदेखि व्यापार ठप्प रहेको व्यवसाय केही दिनदेखि घुम्न र बास बस्न आउनेको संख्या बढेको थाहा नगरपालिका–९ चित्लाङमा रहेको चित्लाङ अग्र्यानिक भिलेज रिसोर्टका सञ्चालक देवेन्द्र नेपालले बताउनु भयो । 

‘अहिले शुक्रबारको दिन ५०–६० जनासम्म बास बस्न आउँछन् । अरु दिन पनि फाट्टफुट्ट घुम्न आइरहेका छन्’, नेपालले भन्नुभयो । कोरोना संक्रमण फैलने डरले आफूहरुले स्वास्थ्य सुरक्षामा पनि ध्यान दिइएको उनहाँले बताउनुभयो । ‘गाउँ वरिपरीको सौन्दर्य देखाइन्छ । संक्रमणको डरले पर्यटकहरुलाई गाउँको मुख्यभागमा घुमाउन लैजाने गरिएको छैन । रिसोर्टमा पनि विशेष स्वास्थ्य सावधानी अपनाइन्छ’ उहाँले भन्नुभयो ।

चित्लाङमा विशेष गरी काठमाडौंबाट आउने पर्यटकको संख्या बढी छ । परिवारसहित एक रात बिताउने गरी चित्लाङमा काठमाडौं र हेटौंडाबाट पर्यटक आउने गरेको होटल व्यवसायीहरु बताउँछन् । चित्लाङमा हाल दुइवटा रिसोर्ट र करिब डेढ दर्जन होमस्टे सञ्चालनमा रहेका छन् ।

त्यस्तै थाहा नगरस्थित दामन पालुङ क्षेत्रमा पनि पर्यटकको आवागमन बढेको छ । प्राकृतिक सौन्दर्यको अवलोकन गर्दै खाने र घुम्नको लागि आउनेको संख्या बढेको थाहा नगर होटल एशोसिएसनका अध्यक्ष शिवकुमार खत्रीले जानकारी दिनुभयो । ‘दसैंअघिसम्म त व्यापार ठप्पै थियो । दसैंको बिदा परेको कारणले पनि होला । केहीदिनदेखि घुम्न आउनेहरु बढेका छन् । यही हिसाबले पर्यटक बढ्दै गए व्यवसाय पुनः तग्रिंन्थ्यो’ खत्रीले भन्नभुयो । थाहानगर को सिमभन्ज्याङ, दामन, पालुङ र चित्लाङमा गरी एक सय ३३ वटा होटल तथा लजहरु एशोसिएसनमा आवद्ध छन् ।

कोरोना महामारी सुरु भएसँगै होटलहरु घाटामै थिए । पर्यटकको चाप बढ्न थालेपछि पुरानै लयमा व्यवसाय फर्कनेमा उनीहरु आशाबादी बनेका छन् ।

त्यस्तै गत चैत ११ गतेबाट भएको लकडाउनयता बन्द भएको डुङ्गा शयर पुनः सुरु गरिएको छ । थााहापाटी श्रोतका अनुसार ईन्द्रसरोबर गाउँपालिका–१ मार्खुस्थित ईन्द्रसरोबर तालमा तीनदिनअघिदेखि डुङ्गा चलाउन थालिएको हो ।

दसैंको अवधिमा पर्यटक ह्वात्तै बढेसँगै डुङ्गा चलाउन थालिएको इन्द्रसरोबर डुङ्गा व्यवसायी संघका अध्यक्ष कृष्णबहादुर भोम्जनले जानकारी दिनुभयो । उहाँका अनुसार अहिले दिनमै ८ सय देखि ९ सय जनासम्म डुङ्गा चढ्न आउने गरेका छन् । ‘दसैंको बेला काठमाडौंबाट धेरै मानिसहरु घुम्न आउन थालेपछि हामीले डुङ्गा चलाउन थालेका हौं । अहिले दिनमै ८–९ सय जनाले डुङ्गा चढिरहेका छन् ।’, उनले केहिदिन यता दैनिक जसो डुङ्गा चढ्नेहरुबाट ७० हजार रुपैयाँको हाराहारीमा आम्दानी भइरहेको बताए । ‘डुङ्गा व्यवसाय त एकाएक पुरानै अवस्थामा फर्किएको छ ।’ भोम्जनले हाल तालममा १० सिटको २ वटा र ३ सिटको एउटा मोटरबोट सञ्चालनमा ल्याइएको छ ।