थाहाको टिष्टुङ रिसोर्टमा थपियो नयाँ आकर्षण, स्वीमिङ पुल सञ्चालनमा

मकवानपुरको पर्यटकीय नगरी थाहा नगरपालिकाको टिष्टुङ रिसोर्टमा अब विभिन्न परिकारका खाना, प्राकृतिक मनोरमताको साथै अब स्वीमिङको मज्जा लिन पाइने भएको छ । फराकिलो परिसर भएको टिष्टुङ रिसोर्टमा १६ जेठमा एक कार्यक्रमकाबीच स्वीमिङ पुलको उद्घाटन भएको छ । कार्यक्रमका प्रमुख तथा विशेष अतिथी नेपाल पर्यटन बोर्ड गण्डकी प्रदेशका प्रमुख मणिराज लामिछाने र होटल व्यवसायी महासंघका अध्यक्ष शंकर भण्डारीले संयुक्त रुपमा स्वीमिङ पुलको उद्घाटन गरेका हुन् ।
प्राकृतिक मनोरमताको साथै काठमाण्डौबाट नजिक रहेको थाहा नगरपालिका वडा नम्बर ६ स्थित टिष्टुङ रिसोर्टमा पर्यटकहरुका लागि स्वीमिङ पुल अर्को आकर्षणको केन्द्र भएको पर्यटन बोर्ड गण्डकीका प्रमुख लामिछानेले बताए । चित्लाङ, टिष्टुङ (हाल बज्रवाराही क्षेत्र) ऐतिहासिक तथा साँस्कृतिक रुपले महत्पूर्ण भएको लामछिानेले चर्चा गरे । उनले थाहानगर क्षेत्रमा नै पर्यटनमैत्री वातावरण रहेको बताए । सन् २०१८ मा पर्यटकीय गाउँ घोषणा भएको कुन्छालको छेवैमा रहेको टिष्टुङ रिसोर्टले थाहानगरकै पर्यटन प्रवद्र्धनमा योगदान दिने उनको विश्वास रहेको थियो ।
कार्यक्रममा होटल व्यवसायी महासँघका अध्यक्ष शंकर भण्डारीले अतिथी उद्यम अन्तर्गत टिष्टुङ रिसोर्टको योगदान पर्यटन प्रवद्र्धनमै केन्द्रित रहेको बताउँदै होटल, रिसोर्ट रेष्टुरेन्ट खुल्नु सुखद् भएको बताए । थाहा नगरपालिका पर्यटकीय नगरी भएको विषय केन्द्रित गर्दै भण्डारीले पर्यटन उद्यमीहरुलाई प्रोत्साहनका कार्यक्रम स्थानीय सरकारले ल्याउन सके यस क्षेत्रको विकासका लागि थप टेवा पुग्ने बताए । रिसोर्टले आफ्ना अतिथीलाई उपलब्ध गराएको स्वीमिङ पुल एउटा महत्वपूर्ण ‘कम्पोनेन्ट’ भएको उनको धारणा थियो । उनले पर्यटन प्रवद्र्धन तथा विकासका लागि सरकारी, निजी तथा सर्वसाधारणको समेत उत्तिकै भुमिका हुने उल्लेख गरे ।
रिसोर्टका अध्यक्ष हरिगोपाल श्रेष्ठले कार्यक्रमका अतिथीहरुलाई स्वागत गरेका थिए । कार्यक्रममा रिसोर्ट सञ्चालकहरु, स्थानीय संघसंसथाका पदाअधिकारीहरु तथा पत्रकार र स्थानीयहरुको उपस्थिती रहेको थियो । कार्यक्रम रिसोर्टका अध्यक्ष हरिगोपाल श्रेष्ठको सभाध्यक्ष्तामा भएको थियो ।