दामनमा बन्यो नेपालकै अग्लो फलामे भ¥याङ, पर्यटकका लागि ‘प्राकृतिक टावर’ तयार

नेपालकै पर्यटकीय आकर्षणको केन्द्र मानिने थाहा नगरपालिकाको दामनमा देशकै सबैभन्दा अग्लो फलामे भ¥याङ निर्माण गरिएको छ । थाहा नगरपालिका वडा नं. ४ का वडा अध्यक्ष दिपकसिं लामाले दामनमा व्यवस्थापन गर्न लागिएको ‘प्राकृतिक टावर’सम्म पुग्न निर्मित भ¥याङ नेपालकै अग्लो फलामे भ¥याङ भएको दावी गर्नुभयो ।

प्राकृतिक सुन्दरताले भरिपूर्ण थाहा नगरपालिका–४, दामनमा १ सय ५७ खुड्किलाको ७० मिटर अग्लो भ¥याङ निर्माण गरिएको छ । भ¥याङबाट माथि समुद्री सतहबाट करिब २ हजार ४ सय मिटरको उचाइमा रहेको अग्लो स्थानलाई प्राकृतिक टावरको रुप दिइएको छ । अग्लो टाकुरालाई वरपरबाट ढुंगा र सिमेन्टको गारोले ‘सपोर्ट’ दिएर प्राकृतिक टावरको रुप दिइएको निर्माण समितिका अध्यक्ष कान्छा लामाले बताउनु भयो ।

दामनमा प्रकृतिक टावर बनेपछि थाहा नगरपालिकामा अब अर्को भ्यु–प्वाइन्ट थपिएको र उक्त प्वाइन्ट नेपालकै पर्यटकीय गन्तव्य बन्न सक्ने थाहा नगरपालिकाका प्रमुख लवशेर विष्टले बताउनु भयो । उक्त भ्यु–प्वाइन्टमा अब व्यवस्थित पार्क निर्माण गर्ने गरी काम भइरहेको स्थानीय समाजसेवी विनोद लामाले जानकारी दिनुभयो । संस्कृति, पर्यटन तथा नागरिक उड्डयन मन्त्रालयको ५० लाख आर्थिक सहयोग र थाहा नगरपालिकाको सहजीकरण रहेको पार्क निर्माण अन्तर्गत फलामे भ¥याङ र भ्यु–प्वाइन्ट निर्माण गरिएको र थप संचरनाका लागि विस्तृत परियोजना प्रतिवेदन(डिपिआर) नै तयार गर्न लागेको वडा अध्यक्ष लामाले बताउनु भयो ।

हाल निर्माण भएको भ्यू–प्वाइन्टबाट विश्वको सर्वोच्च शिखर सगरमाथासहित नेपालका आधा दर्जन उच्च हिम श्रृङ्खला दृश्यावलोकन गर्न सकिन्छ । स्थानीयका अनुसार सो प्राकृतिक टावरबाट १ सय ८० डिग्री वाईड एङ्गलमा नेेपालमा रहेका ८ हजार मिटरमाथिको कन्चनजंघा बाहेकका सबै हिमालहरु देख्न सकिन्छ । पार्कबाट थाहा नगरपालिकाको १,२,३,४,५,६,९ र १० का अधिकांश भूभागको दृष्यावलोकन गर्न सकिन्छ भने बाँकी वडाहरुको आंशिक क्षेत्र देख्न सकिन्छ । पार्कको छिट्टै आधिकारिक नामाकरण गरिने वडा अध्यक्ष लामाले बताउनुभयो ।