दामनको वनस्पति उद्यानलाई पर्यटनसँग जोडौं–नगर प्रमुख विष्ट

–दावा शेर्पा, दामन

थाहा नगरपालिकाका प्रमुख लवशेर बिष्टले पर्वतीय वनस्पति उद्यान दामनलाई पर्यटन प्रबर्धन तथा अध्ययन–अनुसन्धानको दृष्टिले विकास गरिनु पर्ने बताउनु भएको छ । उहाँले उद्यानमा उत्पादित जडिबुटीहरुलाई बजारीकरण गर्न सकिने र वार्षिकरुपमा वनस्पति महोत्सवको आयोजना गरी आर्थिक तथा पर्यटर्कीय लाभ लिन सकिने विचार व्यक्त गर्नु भयो । 

वानस्पतिक अनुसन्धान तथा पर्यटन प्रवर्धनसम्बन्धी आइतबार आयोजना गरिएको कार्यक्रममा उहाँले वनस्पति उद्यान थाहा नगरको ठूलो सम्पत्ति भएको जिकिर गर्नुभयो । 

कार्यक्रममा क्रममा जिल्ला वनस्पति कार्यालयमा भर्खरै प्रमुखको रुपमा आउनु भएका  रघुराज पराजुलीले नेपालमा रहेका ११ वटा वनस्पति उद्यान मध्ये दुईवटा थाहा नगरमा हुनु धेरै महत्वपूर्ण विषय रहेको बताउनु भयो । कार्यक्रममा बोल्दै उहाँले दामनको वनस्पति उद्यान नेपालको एकमात्र पर्वतीय वनस्पति उद्यान रहेको उल्लेख गर्नुभयो । उहाँले उद्यानको संरक्षणमा जोड दिनु पर्ने बताउनु भयो ।  दामनको पर्वतीय वनस्पति उद्यानलाई पर्यटनसँग जोड दिनु पर्ने बताउँदै पराजुलीले निकट भबिस्यमा नै उद्यानभित्र पैदलमार्ग निर्माण सम्पन्न गरिने बताउनु भयो । 

त्यसैगरी कार्यक्रममा थाहा नगरपालिका वडा नं. ४ का वडाध्यक्ष दिपकसिं लामा र करुणाभूमि  सामुदायिक वन उपभोक्ता समितिका अध्यक्ष बिनोदकुमार लामाले वनस्पति उद्यानलाई प्रमुखतः अध्ययन, अनुसन्धान र वातावरण मैत्री पर्यटन क्षेत्रको रुपमा अघि बढाउनुपर्नेमा जोड दिनुभयो ।  उद्यानभित्र रहेका विभिन्न वनस्पतिहरुको संरक्षण हेतु तारबार अनिवार्य गर्नुपर्नेमा उहाँहरुको जोड रहेको थियो । 

कार्यक्रममा  स्थानीय पर्यटन ब्यबसायी तथा एभरेष्ट युवा बिकास क्लबका महासचिव दावा शेर्पा लगायत स्थानीय बासिन्दा र वनस्पति कार्यालयका पदाधिकारीहरुको समेत उपस्थिति रहेको थियो । २०२१ सालमा निर्माण गरिएको उद्यान ६५ हेक्टर क्षेत्रफलमा फैलिएको छ ।