दामनको भर्‍याङ छायांकनस्थल बन्दै, एकैदिन २ वटा भिडियो छायांकन

मकवानपुरको प्रमुख पर्यटकीय स्थल दामनमा रहेको नेपालकै लामो फलामे भर्‍याङ सौन्दर्यप्रेमीहरुका लागि चित्तार्षक त छँदैछ, यही सौन्दर्यमा चलचित्रका निर्देशकहरु पनि आकर्षित भएका छन् । विश्वकै लामो भर्‍याङ दावी गरिएको उक्त भर्‍याङ र भर्‍याङ चढेर पुगिने २४०० मिटर उचाईमा रहेको प्राकृतिक टावर छायांकन स्थल बन्न थालेको छ ।

पहिलोपटक थाहापाटी डटकम र राष्ट्रिय समाचार समितिमार्फत् गरिएको प्रचारप्रसारको छोटोसमयमै चर्चा बटुल्न सफल उक्त भर्‍याङमा एकै दिनमा दुईवटा म्युजिक भिडियोको छायांकन गरिएको छ । 

एकैदिन पालुङ जेसीजका पूर्व अध्यक्ष एवं नवक्षितिज कला केन्द्रका निर्देशक विजयश्याम अमात्यद्वारा निर्देशित ‘परदेशबाट’ एलबम र थाहा कला केन्द्रका अध्यक्ष सानोबाबु मोक्तान निर्देशित ‘गाजलु आँखैले’ एलबमको म्युजिक भिडियो छायाँकन कीर्तिमानी फलामे भर्‍याङमा भएको हो । 

कलाकार एवम् चर्चित निर्देशक विजयश्याम अमात्य रामकुमार प्रधानको ‘परदेशबाट ’ गीतको म्युजिक भिडियोको निर्देशन गर्न कलाकारहरुको साथमा आइतबार प्राकृतिक टावर पुग्नुभएको थियो । उहाँले आफ्नो भिडियो निर्देशनको यात्रामा २७औं म्युजिक भिडियो फलामे भर्‍याङ र प्राकृतिक टावरमा छायांकन गरिएको बताउनु भयो । 

रामकुमार प्रधानको रचना, चन्द्र श्रेष्ठको संगीत र प्रताप दासको श्वर रहेको उक्त गीतको म्युजिक भिडियोमा अस्मिता बिक र सुवाष सोनामले मोडेलिङ गर्नुभएको छ भने पालुङ जेसीजका पूर्व अध्यक्ष भरत गोपाली, रत्न गोपाली र छविराम पराजुलीको समेत अभिनय रहेको छ । भिडियोमा देवेन्द्र गिरी ‘हुरहुर’ को छायांकन रहेको छ भने मेक अपमा रवि केसी रहेका छन् । गीतमा दशैंमा घर आउन नपाएको परदेशी नेपालीको विषयवस्तु समेटिएको छ । 

दामनको भर्‍याङमा म्युजिक भिडियो छायांकन गर्न आइतबारै मकवानपुरका युवा गायक तथा संगीतकार आशिष अस्लामी मगर पनि कलाकारहरुको साथमा आउनु भएको थियो । उहाँले आफ्नै स्वर तथा संगीत रहेको ‘गाजलु आँखैले’ गीतमा म्युजिक भिडियोको छायाँकन गरिएको बताउनु भयो । थाहा–३ का बिवेक पाख्रिनको शब्द रहेको गीतको भिडियोमा भूपेन्द्र राना, सुजु थापा, कृपा गोपाली, सुबु रिजाल र संचारकर्मी अमृत चिमोरियाको अभिनय रहेको छ । ‘गाजलु आँखाले’ यसअघि चर्चित ‘क्या राम्री’ म्युजिक भिडियोको ‘पार्ट टु’ को रुपमा रहेको छ । 

‘यसै पनि प्राकृतिक सौन्दर्यले भरिपूर्ण दामनमा नेपालकै लामो भर्‍याङ निर्माण भएको खबरले हामीलाई झनै आकर्षित गर्‍यो’ अस्लामीले थाहापाटीसित भन्नु भयो । आइतबार छायांकन गरिएको म्युजिक भिडियोमा ड्रोनबाट समेत प्राकृतिक टावर र दामनको भर्‍याङ छायांकनस्थल बन्दै, एकैदिन २ वटा भिडियो छायांकनका दृश्यहरु कैद गरिएका छन् । 

थाहापाटीसितको छुट्टाछुट्टै कुराकानीमा अमात्य र अस्लामीले म्युजिक भिडियो दशैं अगाडि नै सार्वजनिक हुने बताउनु भयो । ‘परदेशबाट’ गीतको म्युजिक भिडियो सकेसम्म कात्तिक १ गते सार्वजनिक गर्ने गरी सम्पादन भइरहेको अमात्यले बताउनु भएको छ । 

दुबै म्युजिक भिडियोका निर्देशक एवम् अस्लामी एक अर्कामा परिचित नामहरु हुन् । एकै दिन एकै स्थलमा छायांकन गर्न पुग्नु संयोग मात्र भएको उनीहरुले बताएका छन् । फलामे भर्‍याङमा ‘परदेशबाट’ छायांकन हुँदा ‘गाजलु आँखैले’ भिडियो समूह दामनको सेल्फी डाँडामा छायांकन गरिरहेको थियो । एकै स्थलमा छायांकन भए पनि दुई समूहको भेट भएन । 

पछिल्ला दिनहरुमा फलामे भर्‍याङ र प्राकृतिक टावर ‘सेल्फी’ लिन चाहनेहरुको लागि समेत आकर्षणको केन्द्र बन्न थालेको छ । सूर्योदयदेखि नै भर्‍याङ चढ्नेहरुको ताँती लाग्ने गरेको स्थानीय समाजसेवी विनोद लामाले बताउनु भयो ।