दामनका होटलमा सवारी चालक र यात्रुलाई खानबस्न बन्द

मकवानपुरको प्रमुख पर्यटकीय स्थलको रुपमा चर्चित थाहा नगरपालिकास्थित दामन बजारमा सवारी चालक तथा यात्रुहरुलाई खानबस्न बन्द गरिएको छ । प्रमुख पर्यटकीय गन्तव्य भए पनि पर्यटनसँगै कोरोना भाइरस संक्रमणको जोखिम भएकोले सवारी चालक, स्टाफ र यात्रुहरुलाई खानेबस्ने सुविधा बन्द गरिएको थाहा होटल एसोसिएसनका अध्यक्ष शिबकुमार खत्रीले बताउनु भयो । 

स्थानीय होटल व्यवसायीहरु, दामन बजार व्यवस्थापन समिति र एभरेष्ट युवा विकास क्लबको बैठकले दामनमा त्रिभुवन राजपथ भएर आउजाउ गर्ने सवारी चालक र यात्रुहरुलाई कुनै सेवासुविधा प्रदान नगर्ने निर्णय गरिएको दामन बजार व्यवस्थापन समितिका अध्यक्ष टासी शेर्पाले जानकारी दिनुभयो । ‘त्रिभुवन राजपथ भएर ओहोरदोहोर गर्ने सवारी चालकहरुलाई दामन बजारमा सवारी नरोक्न आग्रह गरेका छौं’ उहाँले भन्नु भयो । 

त्रिभुवन राजपथले तराईदेखि संघीय राजधानी काठमाण्डौं जोड्ने भएकोले बीचमा सवारी रोकेर स्थानीयको सम्पर्कमा आउँदा कोरोना भाइरस सर्न सक्ने भन्दै स्थानीय होटल व्यवसायीहरु होटलको सेवा बन्द गर्ने निर्णयमा पुगेका हुन् । 

बन्दाबन्दीपछि गत साउन १५ गतेदेखि दामनका होटलहरु संचालनमा आएको भए पनि पर्यटकहरुको चहलपहल थिएन । त्रिभुवन राजपथको बीचमा पर्ने भएकाले फाट्टफुट्ट गारी रोकिने गरेका थिए । 

दामन नजिकै रहेको सीमभन्ज्याङ बजार स्थानीय होटल व्यवसायीहरुको निर्णयमा यसअघि नै बन्द भइसकेको छ ।