थाहानगरमा प्यारा ग्लाइडिङको सफल परीक्षण
अब छिट्टै थाहानगर माथीको आकाशमा प्याराग्लाइडिङमा उड्न पाईने

पर्यटकीय गन्तव्य उत्तरी मकवानपुरको थाहानगरमा प्याराग्लाइडिङको उडाउन गरिएको परिक्षण सफल भएके छ । स्थानीय युवाहरुको समूहले पोखराबाट प्याराग्लाइडिङको विशेषज्ञ बोलाएर गरिएको परीक्षण सफल भए पछि अब छिट्टै थाहानगर माथीको आकाशमा प्याराग्लाइडिङमा उड्न पाईने भएको छ । थाहा नगरपालिका–२ कुटीप्वाल डाँडाबाट थाहाको इन्द्रायणीचौर, फुलपाती चौर, बज्रवाराही र चित्लाङमा अवतरण गर्न सकिने गरी प्याराग्लाइडिङ उडाउन सकिने परीक्षणमा सहभागी विशेषज्ञ अलीले जानकारी दिए । इजरायलका नागरिक अलिले पोखरामा आफ्नै कम्पनी खोलेर व्यवसायिक ढंगले प्याराग्लाइडिङ क्षेत्रमा काम गर्दै आएका छन् । पोखराको सराङ्कोटमा प्याराग्लाइडिङ शुरु गर्नु अघि अलिले यससम्बन्धी ५ वर्ष अनुसन्धान गरेका थिए । पोखराको दुनाटपरी रेस्टुरेन्टमार्फत् सम्पर्कमा आएका अलि दुईवटा प्यारा ग्लाइडिङ लिएर डेढ साताअघि थाहानगर आएका थिए । उनले १० दिन थाहानगरमा विताए । त्यसमध्ये ३ दिन ३ रात लगातार थाहा–२ को कुटिप्वाल(२,१८५ मि.) आसपास क्षेत्रमा हावाको चाप परीक्षण गर्दै प्याराग्लाइडिङ टेस्टिङ गर्दा कुटिप्वालबाट प्याराग्लाइडिङ उडाउन सकिने निष्कर्ष निकालेका थिए । थाहानगरका युवाहरु निरोज प्रधान, रामशरण नेपाल, श्रीराम कार्की, मनोज रायमाझी र अनिल विष्टको समूहले पोखरास्थित दुनाटपरी रेस्टुरेन्टमार्फत् अलिलाई थाहानगर झिकाएका थिए । प्याराग्लाइडिङ परीक्षणको क्रममा भएको खर्च युुवाहरु आफैले व्यहोरेका छन् । प्याराग्लाइडिङको सफल परीक्षण पछि पोखरा फर्किएका अलि आगामी भदौमा पुनः थाहानगर आउने कार्यक्रम रहेको निरोज प्रधानले बताए । ‘भदौमा आउँदा थाहा नगरका युवाहरुलाई निःशुल्क रुपमा प्याराग्लाडिङ उडाउन सिकाउने पनि प्रधनले बताए । प्याराग्लाइडिङको सफल परीक्षणपछि अलीले प्यारा ग्लाइडिङ उडाउनको लागि अहिलेलाई कुटीप्वाल डाँडा सम्म मोटरबाटो पुगेकोले हाललाई कुटीप्वालमा ससाना चिया पसल, कटेज र होटल खोलेर प्यारा ग्लाइडिङ उडाउन सकिने सम्भाव्यता देखाएका छन् । पहिलो चरणमा कुटीप्वालबाट प्याराग्लाइडिङ उडाएपछि दोस्रो चरणमा सीमभन्ज्याङभन्दा उचाइमा रहेको कोटथुम्की(२,७०० मि.) बाट उडाउने पनि निरोज प्रधानले बताए । थाहानगरमा प्यारा ग्लाइडिङ सेवा शुरु गर्न सके काठमाण्डौंबाट नजिक भएकोले पर्यटकहरुको ओइरो लाग्ने आसा गरिएको छ । तर यसको दर्ता प्रक्रिया लामो भएकाले थाहा नगरपालिकाले सहजीकरण गर्नु पर्ने युवाहरु बताउँछन् । यसअघि थाहा नगरकै वडा नं. १२ तारुका डाँडामा पनि प्यारा ग्लाइडिङको सफल परीक्षण गरिएको छ । उक्त डाँडाबाट उडाउने गरी प्यारा ग्लाइडिङ दर्ताका लागि पर्यटन मन्त्रालयमा फाइल पुगिसकेको छ ।