एभरेस्ट पानोरोमा छिट्टै, पुनः संचालनमा आउदै,

करिब तीन दशक अघि (२०४९ मा ) निर्माण भएको थाहा नगरको पहिलो सुबिधा सम्पन्न तीन तारे होटेल  एभरेष्ट पानोरामा रिसोर्ट यसै वर्षदेखि  संचालनमा आउने भएको छ।पश्चिम भारत केरलाबाट नेपाल भ्रमण गर्न आएका मृतकहरुको  असाबधानीले कोठामा  ग्यास हिटरको प्रयोग गर्दा निसास्सिएर दुई परिवारका ८ जना व्यक्तिहरु  ४ बालबालिका र ४ अभिभावकहरुको  २०७६ साल फागुन २६ गतेको दिन दु:खद निधन भए पश्चात् सो रिसोर्ट बन्द भएको थियो,साथै त्यसै वर्षदेखि  कोरोना महामारीको उत्पत्ति भएकोले लामो समयसम्म उक्त रिसोर्ट बन्द हुन पुगेको हो।  

४  परिवारका १५ जना समुहमा आएका पर्यटकहरु पोखराको बसाइँ सकाएर दिउँसोको करिबन १२:०० बजे त्यहाँबाट हिडेका थिए र उनिहरु एभरेष्ट पानोरामा रिसोर्टमा रातको ०९:०० बजे आईपुगेका थिए। खाना खाईसकेपछी ती मध्य २ परिवारका अभिभावकहरुले रातको ०१:३० बजे होटेलका कर्मचारीहरु कसैलाई पनि नभनी आफुखुसी रेस्टुरेन्टमा प्रयोग गर्न राखिएको ठूलो क्षमताको ग्यास हिटर एकजनाको कोठामा लगि प्रयोग गरेका थिए र संगैको अर्को  कोठामा बस्ने परिवार पनि हिटर ताप्न आएका थिए। लामो यात्रा,थकान अनि हिटरको न्यानो रापले सबैजना भुसुक्कै निदाए,जो जहाँ जसरी पल्टेका थिए त्यसतै अवस्थामा देह त्याग  गरे,कोहि सोफामा,कोहि खाटमा त कोहि भुइँमा लडेका थिए। सो दु:खद घटनाले अन्तर्राष्ट्रिय पर्यटन क्षेत्रमा ठुलो हलचल ल्याएको थियो।

यी सबै घटनाहरुको बाबजुद  एभरेष्ट पानोरामा रिसोर्ट पुनः  आफ्नो ऐतिहासिक सानलाई जिवन्त पार्न सकृय भएको छ। यो कदम साच्चै  नै  सराहनीय छ। एभरेष्ट पानोरामा रिसोर्ट र दामन भ्यु टावर रिसोर्टको भौतिक पुर्बाधारहरुको मर्मत,सम्भार गरि नयाँ शैलीले संचालनमा ल्याउने हो भने दामन-सिमभन्ज्याङ पुनः एकपटक चम्कने छ र कहिल्यै छायामा पर्ने छैन।

एभरेष्ट पानोरामा रिसोर्टको भौतिक पुर्वाधार मर्मत,व्यवस्थापन एबं नयाँ संरचनाहरु निर्माणको निम्ति खटिएका एक कर्मचारी नितेश अमात्यका अनुसार  रिसोर्टको प्राबिधिक पक्षहरुलाई  सुधार गर्दै पर्यटन आकर्षणको लागि नयाँ आयामहरु जिप लाइन,ए.टि.भि.मोटरबाइक  (ATV ) संचालनमा ल्याइने  जानकारी गराउनुभयो। साथै दोहोरी साँझ,नेपाली टिपिकल परिकारहरु र अन्य मनोरञ्जनका विकल्पहरु पनि थपिने बताउनुभयो। यो रिसोर्टको व्यवस्थापन पहिला फर्चुना इन्टरनेसनल प्रा.लि.मार्फत हुने गर्दथ्यो भने अब यसको व्यवस्थापन स्वयंले गर्ने भएको छ। हाल यो रिसोर्टमा निर्माण कार्य भैरहेकोले सर्वसाधारणलाई प्रवेशमा निषेध गरिएको छ।