सातौं उपमेयर कप ब्याडमिन्टन सुरु : १३ टिम उपाधि होडमा, विजेतालाई २१ हजार नगद

थाहा, असार १४ — थाहा नगरपालिकाको आयोजना तथा थाहा नगर व्याडमिन्टन संघको व्यवस्थापनमा सातौं उपमेयर कप डबल मेन्स ब्याडमिन्टन प्रतियोगिता आजदेखि थाहा–४ क्याम्पाडाडास्थित कवर्ड हलमा सुरु भएको छ।
तीन दिनसम्म सञ्चालन हुने प्रतियोगितामा १३ टिमको सहभागिता रहेको आयोजकले जनाएको छ। प्रतियोगिता असार १६ गते सम्पन्न हुनेछ।
प्रतियोगितामा प्रथम हुने टोलीले नगद रु. २१ हजार, ट्रफी, मेडल र प्रमाणपत्र प्राप्त गर्नेछ। दोस्रो हुने टोलीले रु. १५ हजार, ट्रफी र मेडल प्राप्त गर्नेछ भने सान्त्वना स्थान हासिल गर्ने टोलीलाई रु. ६ हजार ५०० प्रदान गरिनेछ। त्यसैगरी उत्कृष्ट खेलाडीलाई रु. ५ हजार ५ सय ५५, ट्रफी प्रदान गरिने आयोजकले जनाएको छ।
प्रतियोगिताको दोस्रो पुरस्कार च्वाइस नेपालले प्रायोजन गरेको छ भने सान्त्वना पुरस्कार पालुङ भ्याली हार्ट एकेडेमी र उत्कृष्ट खेलाडी पुरस्कार सिजनेवल फ्रुट एन्ड भेजिटेबल सप्लायर्सका प्रोप्राइटर गणेश कार्कीले प्रायोजन गरेका छन्।
थाहा नगर व्याडमिन्टन संघका उपाध्यक्ष इशाक केसीको अध्यक्षतामा सम्पन्न उद्घाटन समारोहमा वडा नं. ४ का अध्यक्ष नारायण लामा प्रमुख अतिथि रहेका थिए।
कार्यक्रममा थाहा नगर युवा तथा खेलकुद शाखा प्रमुख माधव विक्रम मल्ल, खेलकुद विकास समितिका सदस्य सचिव अनिल लामिछाने, समितिका सदस्य यादव रायमाझी, पालुङ क्याम्पसका अध्यक्ष सुरेन्द्रमान प्रधान, इलाका प्रहरी कार्यालय पालुङका प्रमुख गोविन्द भण्डारी लगायतको उपस्थिति रहेको थियो।
प्रतियोगितामार्फत थाहा नगरमा ब्याडमिन्टन खेलको विकास, खेलाडीको क्षमता अभिवृद्धि तथा स्वस्थ प्रतिस्पर्धात्मक खेल संस्कृतिको प्रवर्द्धन हुने अपेक्षा गरिएको आयोजकले जनाएको छ।