उपमेयर कपमा बिमल–रोशनको दबदबा, सातौं नगरस्तरीय ब्याडमिन्टनको उपाधि कब्जा

थाहा, असार १५ । थाहा नगरपालिकामा जारी सातौं उपमेयर कप डबल मेन्स नगरस्तरीय ब्याडमिन्टन प्रतियोगिताको उपाधि बिमल बिष्ट र रोशन गोपालीको जोडीले जितेको छ।
रोमाञ्चक फाइनल प्रतिस्पर्धामा सुनिल बिष्ट र नवीन रायमाझीको टिमलाई पराजित गर्दै बिमल–रोशनको जोडीले यस वर्षको उपाधि आफ्नो नाम गरेको हो।
विजेता टिमले नगद २१ हजार रुपैयाँसहित ट्रफी, मेडल र प्रमाणपत्र प्राप्त गर्यो भने उपविजेता बनेको सुनिल–नवीनको टिमले नगद १५ हजार रुपैयाँसहित ट्रफी, मेडल र प्रमाणपत्र हात पार्यो। सान्त्वना पुरस्कार सुवास–नारायण र इशाक/ नरेन्द्रको टिमले  नगद ६ हजार ५ सय रुपैयाँ र प्रमाणपत्र प्राप्त गर्यो।
प्रतियोगितामा उत्कृष्ट प्रदर्शन गरेका नरेन्द्र लामा ‘उत्कृष्ट खेलाडी’ घोषित भए। उनले नगद ५ हजार ५ सय ५५ रुपैयाँसहित ट्रफी प्राप्त गरे।
१३ टोलीको सहभागिता रहेको प्रतियोगिताको आयोजना थाहा नगरपालिकाले गरेको थियो भने व्यवस्थापन थाहा नगर ब्याडमिन्टन संघले गरेको थियो। प्रतियोगिताको दोस्रो पुरस्कार च्वाइस नेपालले प्रायोजन गरेको थियो। त्यस्तै, सान्त्वना पुरस्कार पालुङ भ्याली हार्ट एकेडेमी र उत्कृष्ट खेलाडी पुरस्कार सिजनेवल फ्रुट एन्ड भेजिटेबल सप्लायर्सका सञ्चालक गणेश कार्कीले प्रायोजन गरेका थिए।
थाहा नगर ब्याडमिन्टन संघका उपाध्यक्ष इशाक केसीको अध्यक्षतामा सम्पन्न पुरस्कार वितरण समारोहमा थाहा नगर खेलकुद विकास समितिका संयोजक टिकाराम स्याङ्तान प्रमुख अतिथिका रूपमा उपस्थित थिए। कार्यक्रममा थाहा नगरपालिका वडा नं. ३ का अध्यक्ष तथा नगर प्रवक्ता हिरेन्द्रकुमार रायमाझी, खेलकुद विकास समितिका संयोजक अनिल लामिछाने, इलाका प्रहरी कार्यालय पालुङका प्रमुख गोविन्द भण्डारीलगायतको उपस्थिति रहेको थियो।
प्रतियोगिताले नगरभित्र ब्याडमिन्टन खेलप्रतिको आकर्षण बढाउनुका साथै स्थानीय खेलाडीहरूलाई आफ्नो प्रतिभा प्रदर्शन गर्ने महत्वपूर्ण अवसर प्रदान गरेको आयोजकले जनाएको छ।