छैटौं थाहा गोल्डकप: चित्लाङ एफसी र कुर्दन एकेडेमी फाइनलमा प्रवेश

थाहा नगरपालिकाको आयोजना तथा शिखर क्लब को व्यवस्थापनमा थाहा नगरपालिका–३ स्थित इन्द्रायणी चौर मा जारी छैटौं थाहा गोल्डकप फुटबल प्रतियोगिताअन्तर्गत शुक्रबार सम्पन्न सेमिफाइनल खेलबाट चित्लाङ एफसी र कुर्दन एकेडेमी चन्द्रागिरी फाइनलमा प्रवेश गरेका छन्।
पहिलो सेमिफाइनलमा चित्लाङ एफसी ले शिखर क्लबलाई २–१ गोल अन्तरले पराजित गर्दै फाइनल यात्रा तय गरेको हो। पहिलो हाफमा १–० को अग्रता बनाएको शिखर क्लब दोस्रो हाफमा लगातार दुई गोल खाँदै फाइनल पुग्न असफल भयो।
चित्लाङ एफसीको जितमा साइमन लामा र सन्देश गोम्बाले एक–एक गोल गरे भने शिखर क्लबका प्रशान्त रजकले एक गोल फर्काए। खेलमा सन्देश गोम्बा म्यान अफ द म्याच घोषित भए।
त्यस्तै दोस्रो सेमिफाइनलमा कुर्दन एकेडेमीले बतासे फुटबल क्लबलाई ३–० गोल अन्तरले पराजित गर्दै फाइनलमा स्थान सुरक्षित गरेको छ। कुर्दन एकेडेमीका सुजित बुढाथोकी, दावा नोर्वु सेर्पा र अविरल रिजालले एक–एक गोल गर्दै टोलीलाई सहज जित दिलाए। सो खेलमा सुजित बुढाथोकी म्यान अफ द म्याच घोषित भए।
प्रतियोगिताको विजेता टोलीले नगद २ लाख रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेता टोलीले १ लाख रुपैयाँ, मेडल तथा प्रमाणपत्र प्राप्त गर्नेछ। त्यस्तै व्यक्तिगत पुरस्कारतर्फ उत्कृष्ट खेलाडीलाई १२ हजार ५०० रुपैयाँ, तथा उत्कृष्ट गोलरक्षक, उत्कृष्ट डिफेन्डर र सर्वाधिक गोलकर्तालाई जनही ६ हजार २५० रुपैयाँ प्रदान गरिने आयोजकले जनाएको छ।
फाइनल खेल शनिबार दिउँसो १२ बजेदेखि हुने आयोजकले जानकारी दिएको छ।