थाहा कांग्रेसमा नयाँ नेतृत्वको खोजी : कसको हातमा जाला नगरको कमान्ड?

थाहा । नेपाली कांग्रेसको १५औँ महाधिवेशनअन्तर्गत थाहा नगरपालिकामा आज नगर अधिवेशन हुँदैछ। बिहान ११ बजे जेसीज हलमा हुने अधिवेशनले थाहा नगर कांग्रेसको नयाँ नेतृत्व चयन गर्नेछ।
नगर अधिवेशनको पूर्वसन्ध्यामा थाहा कांग्रेसभित्र नेतृत्व हस्तान्तरण र नयाँ समीकरणको चर्चा चुलिएको छ। लामो समयदेखि कांग्रेसको राजनीतिमा सक्रिय रहेका महासमिति सदस्य एवं पुराना नेता भरत लामाले राजनीतिबाट बिदा लिएको घोषणा गरेपछि नगर कांग्रेसमा पुरानो पुस्ताको सक्रियता क्रमशः घट्दै गएको संकेत देखिएको छ।
त्यसैगरी, वर्तमान नगर सभापति प्रमोदकृष्ण जोशी क्षेत्रीय प्रतिनिधिसमेत नबनेपछि उनको राजनीतिक सक्रियताबारे पनि विभिन्न अड्कलबाजी हुन थालेको छ। यद्यपि, उनको आगामी राजनीतिक भूमिकाबारे औपचारिक घोषणा भने भएको छैन।
यस्तो अवस्थामा थाहा नगर कांग्रेसको नेतृत्व अब कसको हातमा पुग्छ भन्ने विषय नगर अधिवेशनको मुख्य चासो बनेको छ।
सभापतिका लागि तीन नाम चर्चामा
नगर सभापतिका लागि विभिन्न नेताहरूको नाम चर्चामा रहे पनि थाहा–६ का वडा अध्यक्ष राजनभक्त श्रेष्ठको नाम अहिले अग्रपंक्तिमा रहेको कांग्रेसभित्रका स्रोतहरू बताउँछन्। संगठनमा उनको सक्रियता र स्थानीय तहको नेतृत्व अनुभवका कारण श्रेष्ठलाई सम्भावित नगर सभापतिका रूपमा हेरिएको स्रोतको दाबी छ।
त्यस्तै, वर्तमान नगर उपसभापति नवराज कार्कीले सभापतिका लागि आफ्नो उम्मेदवारी घोषणा गरिसकेका छन्। लामो समयदेखि नगर संगठनमा सक्रिय कार्की पनि नेतृत्वका प्रमुख दाबेदारका रूपमा देखिएका छन्।
थाहा–८ का पूर्व वडा सभापति रामकुमार घलानले पनि नगर सभापतिमा उम्मेदवारी घोषणा गरेका छन्। वडा तहको संगठनात्मक अनुभव बोकेका घलानको उम्मेदवारीले प्रतिस्पर्धालाई थप रोचक बनाएको छ।
यसैबीच थाहा–७ का वडा अध्यक्ष शिवराज थिङको नाम पनि सभापतिको सम्भावित उम्मेदवारका रूपमा चर्चामा छ। उनले औपचारिक रूपमा उम्मेदवारी घोषणा गरिसकेका हुन् वा होइनन् भन्ने विषयमा भने अन्तिम निर्णय अधिवेशनकै क्रममा स्पष्ट हुने देखिन्छ।
नेतृत्व परिवर्तनको सन्देश
थाहा कांग्रेसको यसपटकको अधिवेशनलाई केवल नेतृत्व चयनको प्रक्रियाका रूपमा मात्र नभई पुरानो पुस्ताबाट नयाँ पुस्तातर्फ नेतृत्व हस्तान्तरणको चरणका रूपमा पनि हेरिएको छ।
एकातिर पुराना नेता भरत लामाको राजनीतिक बिदाइ र वर्तमान नगर सभापति प्रमोदकृष्ण जोशी क्षेत्रीय प्रतिनिधि बन्न नसकेको अवस्था छ भने अर्कोतर्फ वडा तहमा सक्रिय रहेका नेताहरू नगर नेतृत्वका लागि अघि सरेका छन्।
यसले थाहा कांग्रेसमा नेतृत्वको पुस्तान्तरणसँगै संगठनलाई आगामी दिनमा कसरी अघि बढाउने भन्ने बहसलाई पनि सतहमा ल्याएको छ।
आज हुने नगर अधिवेशनले सभापतिसहित नयाँ कार्यसमिति चयन गरेपछि थाहा कांग्रेसको आगामी राजनीतिक दिशा र संगठनात्मक प्राथमिकता पनि थप स्पष्ट हुने अपेक्षा गरिएको छ।
अहिलेको अवस्थामा भने राजनभक्त श्रेष्ठ, नवराज कार्की, रामकुमार घलान र चर्चामा रहेका शिवराज थिङमध्ये अन्ततः कसले नेतृत्वको जिम्मेवारी पाउँछन् भन्ने विषयमा कांग्रेस कार्यकर्ता तथा स्थानीय राजनीतिक वृत्तको ध्यान केन्द्रित भएको छ।