शिक्षक स्वजागरण कार्यक्रम सम्पन्न : तनाव व्यवस्थापनदेखि योग–ध्यानमार्फत आरोग्य जीवनशैलीमा जोड

थाहा, मकवानपुर, साउन ४। आरोग्य थाहा नगरपालिका कार्यक्रम अन्तर्गत "आरोग्य थाहा नगरपालिकाका लागि शिक्षक स्वजागरण" सम्बन्धि एकदिने कार्यक्रम आइतबार थाहा नगरपालिका–४, थानाबजारमा सम्पन्न भएको छ।
कार्यक्रममा नगरपालिकाभित्रका जनकल्याण माध्यमिक विद्यालय, मत्स्यनारायण माध्यमिक विद्यालय र झम्केश्वरी माध्यमिक विद्यालयका ३८ जना शिक्षक–शिक्षिका तथा विद्यालयका कर्मचारीहरूको सहभागिता रहेको थियो। कार्यक्रमको उद्देश्य शिक्षकहरूको दैनिक जीवन तथा कार्यस्थलमा आउने तनाव व्यवस्थापन, क्षमता अभिवृद्धि तथा आफ्नो र विद्यार्थीहरूको आरोग्य जीवनशैली प्रवर्द्धन गर्नु रहेको थियो।
कार्यक्रममा थाहा नगरपालिकाका मेयर विष्णुबहादुर बिष्ट, उपमेयर भरत गोपाली तथा शिक्षा, युवा तथा खेलकुद शाखाका प्रमुख माधवविक्रम मल्लको उपस्थिति रहेको थियो।
जीवन विज्ञान प्रशिक्षक सन्तोष चौंरेलले प्रशिक्षण दिँदै प्रत्येक व्यक्तिभित्र रहेको खुसी हुने क्षमताको पहिचान गर्नुपर्नेमा जोड दिनुभयो। उहाँले जीवनको लक्ष्य निर्माण, मानसिक शान्ति प्राप्त गर्ने उपाय, बढ्दो आत्महत्या रोकथामका उपाय, विद्यार्थीहरूको स्मरणशक्ति वृद्धि गर्ने अभ्यास तथा सकारात्मक बानीको विकासबारे योगका प्रयोगात्मक अभ्याससहित प्रशिक्षण दिनुभयो।
जनकल्याण माध्यमिक विद्यालयका प्रधानाध्यापक रामकुमार बलले योगासन, प्राणायाम र ध्यानका विभिन्न विधिले व्यक्तिभित्र रहेको ऊर्जाको पहिचान गर्न तथा शिक्षक र विद्यार्थी दुवैको जीवनलाई आरोग्य बनाउन महत्वपूर्ण भूमिका खेल्ने बताउनुभयो।
त्यसैगरी मत्स्यनारायण माध्यमिक विद्यालयका प्रधानाध्यापक श्याम लामाले सामूहिक ऊर्जा–ध्यानमार्फत वर्तमान क्षणको आनन्द अनुभूति भएको उल्लेख गर्दै विद्यालयमा यस्ता कार्यक्रमलाई निरन्तरता दिने प्रतिबद्धता व्यक्त गर्नुभयो।
कार्यक्रमको समापन गर्दै थाहा नगरपालिकाका  शिक्षा शाखा प्रमुख माधवविक्रम मल्लले कार्यक्रम सफल बनाउन सहयोग गर्ने प्रशिक्षक तथा सहभागी सबैलाई धन्यवाद ज्ञापन गर्नुभएको थियो।