विद्यार्थीलाई लक्षित तीनदिने ‘माइन्ड एन्ड मोटिभेसनल’ शान्ति तथा ध्यान शिविर सम्पन्न

बोधिचर्य फाउन्डेसनको आयोजनामा थाहा नगरपालिकामा बृहत शान्ति तथा ध्यान शिविर अन्तर्गत तीनदिने “MIND AND MOTIVATIONAL WORKSHOP” सञ्चालन भएको छ। अहिंसा, करुणा र ध्यानमा आधारित उक्त शिविरमा थाहा नगरका करिब ५ सय विद्यार्थीले सहभागीता जनाएका थिए।
तीन दिने शिविरमा महान महापण्डित त्रिकाय सिद्धान्तका उज्ज्वल प्रकाशक आचार्य लोङछेन रबज्यामको महापरिनिर्वाण दिवस (पुण्यतिथि) को  अवसरमा शिविरको आयोजना गरिएको हो।
शिविरमा विद्यार्थीहरूको सक्रिय सहभागिता रहेको थियो। कार्यक्रममा जनकल्याण उच्च माध्यमिक विद्यालय, मत्स्यनारायण माध्यमिक विद्यालय, झम्केश्वरी माध्यमिक विद्यालय तथा हिमालयन बोर्डिङ स्कूलका विद्यार्थीहरू सहभागी भएका थिए।
कार्यशालामा आचार्य धावा दोर्जे तामाङ, उपाध्याय पेम्बा सेर्पा, उपाध्याय कोन्छो नोर्बु तामाङ तथा बोधिचर्य फाउन्डेसनका पवन लामाको उपस्थिति रहेको थियो। विशेष वक्ताका रूपमा प्रतिष्ठित नामड्रोलिङ विश्वविद्यालय (Namdroling University) बाट बौद्ध दर्शनमा पारंगत, अनुभवी तथा साधनामा निपुण उपाध्याय पेमा शेर्पा ज्युले जीवन, मन र करुणाको गहिरो बोध प्रदान गर्दै विद्यार्थीहरूलाई प्रेरित गर्नुभयो।
फाउन्डेसनका अनुसार उक्त कार्यशालाले भावी पुस्तामा सदाचार, करुणा, अनुशासन र विवेकपूर्ण चेतनाको विकास गराई सकारात्मक सोच र शान्त समाज निर्माणमा योगदान पुर्‍याउने विश्वास लिइएको छ।