लौठ सल्ला र सुनाखरी(आर्किड)को प्राकृतिक बासस्थान संरक्षणका लागि अन्तरक्रिया कार्यक्रम सम्पन्न

थाहानगर— ग्रीनहुड नेपाल नामक संस्थाको आयोजनामा मकवानपुर जिल्लामा औषधीय वनस्पति तथा तिनका प्राकृतिक बासस्थान संरक्षणलाई केन्द्रित गर्दै स्थानीय सरोकारवालासँग अन्तरक्रिया कार्यक्रम सम्पन्न भएको छ।
थाहा नगरपालिका वडा नं. ३ मा अवस्थित ऋषेश्वर सामुदायिक वन र काली बन्जार सामुदायिक वन का उपभोक्ता समिति तथा स्थानीय सरोकारवालासँग लौठ सल्ला र सुनाखरी जस्ता महत्वपूर्ण औषधीय वनस्पतिको संरक्षणका विषयमा छलफल तथा सल्लाह–परामर्श गरिएको हो। कार्यक्रम ऋषेश्वर सामुदायिक वनको शिखरकोटमा अवस्थित विकास घर तथा काली बन्जार सामुदायिक वनको दम्कीस्थित सामुदायिक वन भवनमा सम्पन्न भएको थियो।
कार्यक्रममा थाहा नगरपालिकाका नगर प्रमुख विष्णु बिष्ट, झम्केश्वरी सब–डिभिजन वन कार्यालयका प्रमुख सागर प्रसाद जैसी, सामुदायिक वन उपभोक्ता महासंघ थाहाका अध्यक्ष गणेशमान श्रेष्ठ, ग्रीनहुड नेपालका अनुसन्धानकर्ता तथा कार्यक्रम प्रमुख रेशु बस्याल,कालीबन्जार सामुदायिक बनका अध्यक्ष कमल कुमार केसी, ऋषेश्वर सामुदायिक बनका कार्यवाहक अध्यक्ष बिनोद केसी, लगायत विभिन्न क्षेत्रका प्रतिनिधिहरूको उपस्थिति रहेको थियो।
अन्तरक्रिया कार्यक्रममा ग्रीनहुड नेपालका अनुसन्धान सहायक कृतना भण्डारी र ग्रीनहुड नेपालका अध्यक्ष ज्ञानेन्द्र आचार्य ले सहजीकरण गर्दै औषधीय वनस्पति संरक्षणमा स्थानीय सामुदायिक वन उपभोक्ता समितिको भूमिका, दिगो व्यवस्थापन, अवैध संकलन नियन्त्रण र जैविक विविधता संरक्षणका विषयमा प्रकाश पारे।
कार्यक्रममा सहभागी वक्ताहरूले औषधीय वनस्पति केवल आर्थिक स्रोत मात्र नभई वातावरणीय सन्तुलन र जैविक विविधताको महत्वपूर्ण आधार भएको उल्लेख गर्दै संरक्षणमा स्थानीय समुदायको सक्रिय सहभागिता अपरिहार्य रहेको धारणा व्यक्त गरे। स्थानीय तह, सामुदायिक वन र संरक्षणकर्मीबीच सहकार्य बढाउँदै लैजान सके दीर्घकालीन संरक्षण सम्भव हुने निष्कर्ष निकालिएको थियो।
यस किसिमका अन्तरक्रिया कार्यक्रमले औषधीय वनस्पति तथा प्राकृतिक बासस्थान संरक्षणप्रति समुदायको चेतना अभिवृद्धि गर्नुका साथै दिगो वातावरण संरक्षणमा टेवा पुग्ने अपेक्षा गरिएको छ।