बिबिध कार्यक्रम सहित थाहामा मनाइयो बिश्व वातावरण दिवस

थाहा नगर , जेठ २३/ हाम्रो भुमी,हाम्रो भविष्य  भन्ने विश्वव्यापी नाराका साथ थाहामा बिबिध कार्यक्रम गरी विश्व वातावरण दिवस २०८१ भव्य रूपमा मनाइएको छ । 
थाहामा पनि यही नाराकासाथ विभिन्न  संघ-संस्था,बजार व्यवस्थापन समिती,टोल बिकास समिती र विद्यालयहरुले  सो दिवस मनाएका हुन् ।

थाहा नगरपालिकाको आयोजनामा थाहा ४ नयाँगाउँमा अवस्थित थाहा पार्क परिसरमा  कागती, सुन्तला, आलुबखडा,आल्चा,मुन्तला  लगायतका फलफूलका बिरुवा रोपण गरिएको छ । 
हाम्रो भूमि अर्थात् पृथ्वीलाई स्वच्छ राख्दा नै सबैको भविष्य सुरक्षित हुन्छ भन्ने सन्देश दिवसको नाराले दिन खोजेको छ । मानवता भूमिमा निर्भर छ, तैपनि संसारभरि प्रदूषणको विषाक्तता, जलवायु परिवर्तनको अराजकता र जैविक विविधताको विनाशले स्वस्थ भूमिलाई मरुभूमिमा परिणत गर्दै छ र समृद्ध पारिस्थितिक प्रणालीलाई मृत क्षेत्रमा परिणत गर्दै छ । 
साथै  जङ्गल र घाँसे मैदान विनाश गर्दै पारिस्थितिक प्रणाली, कृषि र समुदायमा समेत गम्भीर असर पारेको छ । यस्ता मानवीय क्रियाकलाप र व्यवहारलाई परिवर्तन गरी वातावरणको संरक्षणका लागि हामी सबै मानव जातीले गम्भीर भएर सोच्न आवश्यक छ ।

 संयुक्त राष्ट्रसङ्घीय वातावरण कार्यक्रमको आह्वानमा हरेक वर्ष जुन ५ तारिखमा यो दिवस विश्वभर मनाउने गरिन्छ । सन् १९७३ देखि विश्व वातावरण दिवस मनाउन सुरु गरिएको हो । 

दिवसको अवसरमा थाहा नगरपालिकाका नगर प्रमुख बिष्णु बिष्टले स्वच्छ वातावरणमा बाँच्न पाउने संवैधानिक हकलाई सार्थक बनाउन प्रण गर्नुपर्ने बताउनु भयो । उहाँका अनुसार सबैको सहयोगले जलवायुको समस्या, हरितगृह ग्यास उत्सर्जनको कारणले भएको वातावरण प्रदूषणलाई कम गर्न वृक्षारोपण आवश्यक रहेको, हरितगृह ग्याँसको उत्सर्जन कम गर्नु भनेको वन जङ्गलको संरक्षण, संवर्द्धन र वन विकासमा टेवा पुर्‍याउने उद्देश्यले सिम्बोलिक रूपमा वृक्षारोपण गरी विश्व वातावरण दिवस मनाइएको हो । त्यसका लागि सबैले आफ्नो घर वरिपरि रहेको वातावरण सफा राख्दै वन, जल, वनस्पति, कृषि तथा जीवहरूको पर्यावरणीय सम्बन्धलाई जीवनमुखी बनाउनुपर्ने उहाँको भनाइ छ।