बालमैत्री वडा घोषणाका लागि अभिमुखीकरण कार्यक्रम सम्पन्न

मकवानपुर, थाहा नगरपालिका – थाहा नगरपालिकामा बालमैत्री वडा घोषणा अभियानलाई अघि बढाउँदै असार १० गते वडा स्तरीय समिति तथा सरोकारवालाहरुको अभिमुखीकरण कार्यक्रम सम्पन्न भएको छ।
नगरको वडा न १ र ३ लाई बालमैत्री वडा घोषणा गर्ने अभियान अन्तर्गत कार्यक्रम आयोजना गरिएको हो।

थाहा नगरपालिकाको आयोजनामा सम्पन्न उक्त कार्यक्रममा नगर प्रमुख विष्णु बिष्ट, वडा न १ को अध्यक्ष हेरमान गोपाली,वडा नं. ३ का अध्यक्ष हिरेन्द्र कुमार रायमाझी, सामाजिक विकास शाखा प्रमुख अनिल लामिछाने, स्वास्थ्य शाखा प्रमुख मेघराज बलामी, शिक्षा शाखा अधिकृत सुर्य लामा, इलाका प्रहरी कार्यालय पालुङका प्रमुख सविन बाबू अर्याललगायत वडा न १ र ३ का  विभिन्न सरोकारवालाहरुको उपस्थिति थियो।

कार्यक्रममा वडा स्तरीय बाल क्लब, स्थानीय स्वास्थ्य संस्थाका प्रमुख, महिला स्वास्थ्य स्वयंसेविका तथा विभिन्न संघसंस्थाका प्रतिनिधिहरूको सक्रिय सहभागिता रहेको थियो।

कार्यक्रमका फोकल पर्सन तथा प्रशिक्षक कुमार नेगीले बालमैत्री स्थानीय शासनका सूचकहरू, तिनीहरूको कार्यान्वयन चरण, तथा बालमैत्री वडा घोषणाका प्रक्रिया विषयमा सहजीकरण गरेका थिए। कार्यक्रममा पूर्वतयारी, समुदायस्तरीय समिति गठन तथा सूचकहरूको स्थानीयकरण गर्ने निर्णय समेत गरिएको थियो।
कार्यक्रममा थाहा नगरपालिकाका नगरप्रमुख विष्णु बिष्टले कार्यक्रमलाई सम्बोधन गर्दै बालमैत्री स्थानीय शासन घोषणा नगरपालिकाको प्राथमिक एजेन्डामध्ये एक भएको बताउनुभयो।

उहाँले भन्नुभयो, "बालबालिकाको अधिकार सुनिश्चित गर्नु हाम्रो दायित्व हो। त्यसैले थाहा नगरपालिकाले बालमैत्री स्थानीय शासनको मापदण्ड पुरा गर्नका लागि आवश्यक संरचना, नीति तथा कार्यक्रमहरू सञ्चालन गरिरहेको छ।"
मेयर बिष्टका अनुसार पालिकाले वडा तहमा बालमैत्री समिति गठन, बाल क्लबहरूको सक्रियता, स्वास्थ्य तथा शिक्षामा पहुँच विस्तार, बालश्रम न्यूनीकरण, बाल हिंसा विरुद्ध जनचेतना कार्यक्रम, र बालबालिकाका लागि सुरक्षित तथा अनुकूल वातावरण निर्माणमा विशेष ध्यान दिइरहेको छ।

उहाँले  बालमैत्री घोषणा केवल कागजी प्रक्रिया होइन, यो व्यवहारमा लागु भएर मात्र सार्थक हुन्छ। त्यसैले सबै वडामा सहभागी, उत्तरदायी र दिगो पहलमार्फत यस अभियानलाई सफल बनाउने छौँ।"