बागेश्वरी कृषि सहकारी संस्थाको ११ औं वार्षिक साधारणसभा सम्पन्न

थाहा नगरपालिकाको वडा नं. ३ मा स्थित बागेश्वरी कृषि सहकारी संस्थाको ११ औं वार्षिक साधारणसभा सम्पन्न भएको छ। संस्थाका अध्यक्ष दिनेश बिष्टको अध्यक्षता तथा संस्थाका संस्थापक सदस्य जय बहादुर कार्कीको प्रमुख आतिथ्यतामा उक्त सभा संस्थाको प्राङ्गणमा आयोजना गरिएको हो।
साधारणसभामा पूर्व सचिव लक्ष्मण बिष्ट, सुभारम्भ कृषि सहकारीका उपाध्यक्ष सरोज बिष्ट, आग्रा कृषि सहकारी संस्थाका अध्यक्ष रमेश सेन्चुरी, र लेखा परिक्षक बिमल कुमार बिष्टको विशेष आतिथ्यता रहेको थियो।
साधारणसभामा संस्थाका अध्यक्ष दिनेश बिष्टले संस्थाको वार्षिक प्रतिवेदन प्रस्तुत गर्दै संस्थाको मुख्य उद्देश्य र लक्ष्य आधुनिक खेतीमा सदस्यहरुलाई जोड दिनु रहेको उल्लेख गरे। उनले भने, "प्रविधी र विशेषज्ञहरूसँग सदस्यलाई जोड्नु हाम्रो प्राथमिकता हो। सहकारीबाट प्रत्यक्ष निगरानीमा रहेका खेती ९० प्रतिशतसम्म सफल भएका छन् र कारोबार पनि बढ्दै गएको छ।"
साधारणसभामा सचिव लक्ष्मण बर्तौला "बिर्खे अन्जान" ले सचिवको प्रतिवेदन प्रस्तुत गर्दै संस्थाको कारोबार २ करोड पुगेको जानकारी दिए। कोषाध्यक्ष राजेन्द्र बिष्टले पनि आफ्नो प्रतिवेदन प्रस्तुत गरे।
कार्यक्रममा उत्कृष्ट कारोबार गर्ने सदस्यहरूलाई सम्मानित गरियो। बचत तर्फ कन्चन बिष्ट, दैनिक बचतमा मनश्याम बस्नेत, र कर्जा तर्फ शिखर सप्लायर्सका बिश्वनाथ रायमाझीलाई नगद र सम्मानपत्र प्रदान गरिएको थियो। साथै, बीउ बिजन र मल खाद खरिदमा उत्कृष्ट कार्य गर्ने सदस्यहरू दुर्गा कार्की र राजाराम कार्कीलाई पनि सम्मानित गरियो।
साधारणसभामा पूर्व सचिव लक्ष्मण बिष्ट, सुभारम्भ कृषिका सरोज बिष्ट र लेखा परिक्षक बिमल कुमार बिष्टले संस्थालाई शुभकामना दिएका थिए। कार्यक्रममा संस्थाका कार्यसमिति सदस्यहरू, कर्मचारी र सेयर सदस्यहरूको उल्लेखनीय उपस्थिती रहेको थियो।