पहिरोका कारण जताततै सडक अवरुद्ध 

मदन भण्डारी मागृकाे छैमले

केही दिन देखि परेको अविरल वर्षाका कारण देशका विभिन्न स्थानमा पहिरो जाँदा सडक अबरुद्ध भएका छन् । हेटौंडा कुलेखानी दक्षिणकाली सडक पनि सिस्नेरी छैमले खण्डको ठाँउ ठाँउमा पहिरो खस्दा अवरुद्ध भएको छ । 

सिन्धुलीको सुनकोशी गाउँपालिका १ कमेरेफाँटमा खसेको पहिरोका कारण वीपी राजमार्ग बन्द भएको छ । सिन्धुलीमा बिहान पौने १२ बजे पहिरो खसे पछि सो राजमार्ग बन्द भएके हो ।  
पहिरोका कारण पृथ्वी राजमार्ग पनि बन्द भएको छ । सडक बन्द हुँदा चितवनर धादिङ हुँदै काठमाण्डौ आउने गाडी पनि बीच बाटोमा नै रोकिएका छन् ।  धादिङ र चितवनको सीमामा पर्ने मौवाखोलामा पहिरो खसेपछि सडक अवरुद्ध भएको हो । सो सडकको इच्छाकामना गाउँपालिका ६ चारकिलो खण्डमा  बिहान ५ बजेतिर दुई वटा विद्युतका पोलसहित ठूलो पहिरो खसेपछि नारायणगढ–मुग्लिन सडकखण्ड बन्द भएको हो । पानी लगातार परिरहेको र माथिबाटसमेत थप पहिरो खसिरहेकाले आज दिनभर जस्तो सडक बन्द हुन सक्ने प्रहरीले जनाएको छ । यात्रुलाई वैकल्पिक बाटो भएर आवत जावत गर्न धादिङ्ग प्रहरीले  आग्रह गरेको छ । 
यस्तै रसुवाको गोसाईँकुण्ड गाउँपालिका ३ कुलुङ पुलमा स्याँफ्रुबेसी–टिमुरे पासाङ ल्हामु सडकखण्ड पहिरोका कारण पूर्णरुपमा बन्द भएको छ । 
लमजुङको मर्स्याङ्दी गाउँपालिका ४ च्याम्चेमा पहिरोले बेसीसहर मनाङ सडकखण्ड पनि बन्द भएको छ । 
प्युठानको सरूमारानी गाउँपालिका ४ को पाकुरी खोलाको भालुबाङ रोल्पा सडकखण्ड बिहानदेखि बन्द छ । 
दाङको घोराही उपमहानगरपालिका १९ च्यानगैरामा घोराही–रोल्पा–होलेरी सडकखण्ड बन्द छ ।