न्यायिक समिति तथा जनप्रतिनिधिसंगको अन्तर संवाद कार्यक्रम थाहामा सम्पन्न ।

मुख्य न्यायाधिवक्ताको कार्यालय बागमती प्रदेश हेटौंडाको आयोजनामा थाहामा एक दिने  न्यायिक समिती तथा जनप्रतिनिधि संग अन्तर संवाद कार्यक्रमको आयोजना गरेको छ।
नगरको होटल पाइनस नयाँगाउँमा सम्पन्न एकदिने अन्तर संवाद कार्यक्रममा थाहा नगरपालिका सहित ईन्द्रसरोवर गाउँपालिका तथा कैलाश गाउँपालिकाका न्यायिक समिती सदस्य तथा संयोजक हरु लगायत पालिका प्रमुख तथा उपप्रमुख सहितको उपस्थिति रहेको थियो।
मुख्य न्यायाधिवक्ताको कार्यालय हेटौंडाका उप न्यायाधिवक्ता बासुदेव लम्सालको  अध्यक्षतामा सम्पन्न अन्तर संवाद कार्यक्रममा मुख्य न्यायधिवक्ता ज्ञानेन्द्र नेपाल ,ठाकुरराम भण्डारी शाखा अधिकृत मुख्य न्यायाधिवक्ताको कार्यालयले सहजीकरण गरेका थिए ।
अन्तर संवाद कार्यक्रममा सहजकर्ताहरुले न्यायिक समितिमार्फत हुने मेलमिलाप विवाद समाधानको वैकल्पिक उपायको औपचारिक संयन्त्र भएको चर्चा गर्दै  अन्य उपायहरू अत्यन्त महँगो हुने हुँदा यसको लोकप्रियता बढिरहेको  तर यो अदालतको विकल्प भने नभएको बताएका थिए ।
कार्यक्रममा प्रमुख अतिथी समेत रहेका थाहा नगर प्रमुख बिष्णु बिष्टले स्थानीय तहको विवाद स्थानीय तहमा नै मिलाउने राज्यको नीति सराहनीय भएको उल्लेख गर्नुभयो । मेलमिलापको माध्यमद्वारा न्याय निरूपण हुँदा “मैले केही छोडेँ, उसले केही छोड्यो” भन्ने हार्दिक मनोभाव पनि बढ्ने हुँदा यो व्यवस्था प्रशंसनीय रहेको चर्चा गर्दै उहाँले भन्नुभयो यो प्रक्रियालाई अझ विश्वसनीय बनाउन तालिमप्राप्त मेलमिलापकर्ताको परिचालन गर्नुपर्ने तथा मेलमिलाप केन्द्रहरूको स्थापना गर्नुपर्नेमा जोड दिनुभयो ।
कार्यक्रममा मेलमिलापकर्ता हरुले न्यायिक समितिले सामाजिक मुद्दाहरू निरूपण गर्नुपर्ने हुँदा ,कुनै मुद्दाहरूको समाधान खोज्ने प्रक्रिया बढ्दै जाँदा कानुनी समस्या उत्पन्न हुने  र प्रक्रिया अघि बढ्न कठिन हुने हुँदा न्यायिक समितिहरूलाई निर्भीक रूपमा काम गर्ने वातावरण तयार गर्न कानुन सल्लाहकारको व्यवस्था मिलाउनु अत्यन्त जरुरी रहेको औल्याएका थिए  ।
अन्तर संवाद कार्यक्रममा थाहा नगरका उपप्रमुख भरत गोपाली,कैलाश गाउँपालिकाका अध्यक्ष लोक मोक्तान,कैलाशका उपाध्यक्ष वालकुमार मल्ल,ईन्द्रसरोवर गाउँपालिकाका उपाध्यक्ष उमा कुमारी लामा,थाहा नगरपालिकाका प्रमुख प्रशासकीय अधिकृत कृष्ण गिरी,कैलाशका प्रमुख प्रसाशकिय अधिकृत असोक बिष्ट ,इन्द्रसरोवरका प्रशासकीय अधिकृत प्रल्हाद कार्की,लगायत न्यायिक समिती सहजकर्ता ,मेलमिलापकर्ताहरु,वडा अध्यक्षहरुको सहभागिता रहेको थियो।