नेपाल उद्योग वाणिज्य महासंघ बागमती प्रदेश रोजगार समितिको उपसभापतिमा थाहानगरका कार्की

नेपाल उद्योग वाणिज्य महासंघ बागमती प्रदेशको रोजगार समितिको उप सभापतिमा थाहानगर उद्योग वाणिज्य संघका सदस्य शम्भु सिंह कार्की मनोनित भएका छन् । नेपाल उद्योग वाणिज्य महासंघ अन्तर्गत प्रदेश उद्योग वाणिज्य महासंघको गठन तथा संचालन सम्बन्धी नियमावली, २०७३ बमोजिम प्रधानलाई सदस्यमा मनोनित गरेको बागमती प्रदेश अध्यक्ष दिल सुन्दर श्रेष्ठले जानकारी दिए । समितिको सभापतिमा भने नेपाल उद्योग वाणिज्य महासंघ बागमतीका सदस्य बिरेन्द्र नाथ भट्टराई रहेका छन् । महासंघको १६ वैशाखमा सम्पन्न बैठकले समितिको सदस्यहरु मनोनित गरेको हो । समितिको सदस्यहरुमा हिटको प्रालिका प्रदिपमान प्रधान,क्वालिटी किचन इन्भेस्टमेन्ट प्रालिका उज्वल सत्याल,भ्याली कोल्ड स्टोरका सक्षम घिमिरे,बाघभैरव प्रीन्टिङ हवका सुकदेव जोशी,र नेपाल औषधि उत्पादक संघका सदस्य सन्तोष बराल मनोनित भएका छन् । थाहानगरको पालुङ जेसीज भवनमा ३२ साउनमा भएको बागमती प्रदेशस्तरीय विषयगत समिति परिचयात्मक कार्यक्रमको अवसरमा मनोनित सबैलाई शुभकामनासहित प्रमाणपत्र वितरण गरिएको थियो । कार्यक्रममा महासंघ बागमती प्रदेशका पदाअधिकारी तथा विषयगत समितिका सदस्यहरुको उपस्थिती रहेको थियो । नेपाल उद्योग वाणिज्य महासंघ बागमती प्रदेश अन्तर्गत १ दर्जन बढि विषयगत समितिहरु गठन भएका छन् ।