थाहा नगरमा व्यावसायिक सीपमूलक आलु परिकार तयारी तालिम सुरु

मकवानपुरको थाहा नगरपालिकामा व्यावसायिक सीप विकासको उद्देश्यले आलु परिकार तयारी तालिम सुरु भएको छ। असार ५ गतेदेखि प्रारम्भ भएको तालिम होटल सुनगाभामा सञ्चालन भइरहेको छ। तीन दिनसम्म चल्ने तालिममा ३५ जनाको सहभागीता रहेको पालुङ बहुउद्देश्यीय सहकारीका सह व्यवस्थापक राम प्रसाद ढकालले जानकारी दिए।

तालिम पालुङ बहुउद्देश्यीय सहकारी संस्था लिमिटेडको आयोजनामा र बागमती प्रदेश सरकारको सहकारी तथा गरिबी निवारण मन्त्रालयको साझेदारीमा संचालन गरिएको हो।

तालिममा प्रशिक्षकको रूपमा हिमाल भुषाल, जो आलु बाली विकास केन्द्र, सिन्धुपाल्चोकमा कार्यरत छन्, उपस्थित छन्। उनले आलुबाट तयार गर्न सकिने विभिन्न परिकारहरूको तयारी विधिबारे सहभागीहरूलाई व्यावहारिक प्रशिक्षण दिइरहेका छन्।

कार्यक्रमको सुरुवाती सत्रमा सहकारी संस्थाका अध्यक्ष कृष्ण बहादुर बिष्ट, लेखा समिति सदस्य रुपचन्द्र गोपाली र राजकुमार कार्की, कार्यसमिति सदस्यहरू रिता कार्की, जानुका ढकाल, राजन ढकाल, व्यवस्थापक प्रकाश पौडेल र सह व्यवस्थापक राम प्रसाद ढकालको उपस्थिति रहेको थियो।

तालिमको उद्घाटन सत्रमा सहभागीहरूलाई स्वागत गर्दै आयोजकले यस्तो प्रकारका सीपमूलक तालिमहरू ग्रामीण क्षेत्रमा स्वरोजगारको राम्रो आधार बन्न सक्ने विश्वास व्यक्त गरेका थिए।