थाहा नगरपालिका द्वारा लघु उद्यमीलाई प्रविधि हस्तान्तरण

थाहा नगरपालिकाले लघु उद्यमीलाई प्रविधि सहयोग गरेको छ । गरिवी निवारणको लागि लघु उद्यम विकास कार्यक्रम अन्तर्गत नगरपालिकाले थाहाका दामन महिला अल्लो हेन्डिक्राफ्ट उद्यमी समुहलाई आज प्रविधि हस्तान्तरण गरेको हो ।

बिकास घरको  हलमा आयोजित कार्यक्रममा अल्लो तथा हेम्प बाट बनेको कपडा सिलाउने हेवी जुकि मेसीन मोटर सहित एक थान तथा हेवी जुकि लक मेसीन मोटर सहित एक थान गरी एक लाख पचास हजार रुपैयाँ बरावरको मेसीन वितरण गरिएको मेड्पाकी  कार्यक्रम संयोजक सुनिता बुढाले जानकारी दिइन् ।
 उक्त सामाग्रीहरु नगर प्रमुख बिष्णु बिष्ट, वडा नम्बर ३का वडा अध्यक्ष हिरेन्द्र कुमार रायमाझी,थाहा नगरका प्रमुख प्रशासकीय अधिकृत कृष्ण गिरी,रोजगार संयोजक कुमार नेगी र मेड्पाका फोकल  पर्सन अस्मिता तिवारी घिमिरेले संयुक्तरुपमा हस्तान्तरण गरे ।

कार्यक्रममा बोल्दै नगर प्रमुख बिष्टले आफ्नो सिप र क्षमतालाई सदुपयोग गर्दै अघि बढ्नु पर्ने बताउनुभयो। राज्यको सम्पति दुरुपयोग गर्न नहुने भन्दै उनले नगरले प्रदान गरेका सामाग्रीहरुको सहि सदुपयोग गर्न आग्रह गरे । शीपलाई श्रम र श्रमलाई बजारसंग जोड्नु पर्ने बताउँदै नगर प्रमुख बिष्टले वैदेशिक रोजगारीमा जानु भन्दा यहि मेहनत गर्न सके जिवनस्तर उकास्न सकिने धारणा राख्नुभयो । उनले आर्थिक उपार्जनका लागि उत्पादनमा जोड दिन सहभागीहरुलाई आग्रह गरे ।

यस्तै नगरका प्रमुख प्रशासकीय अधिकृत कृष्ण गिरीले स्वरोजगारका लागि गरिएको यो सहयोग ठिकसंग उपयोग गर्नु पर्ने बताए । प्रविधिसँग जोडेर काम गर्नु पर्ने बताउँदै उनले आज वितरण गरीएको प्रविधि उपयोग भए नभएको बारे नगरले अनुगमन गर्ने बताए । अनुगमनका क्रममा सामाग्री उपयोग नभएको पाइए फिर्ता ल्याएर अन्यलाई वितरण गर्ने जनाइएको छ ।

नगरपालिकाले लघु उद्यम विकास कार्यक्रम अन्तर्गत व्युटीपार्लर, सिलाई कटाई , डल बनाउने, मुढा बनाउने, कृस्टलको गहना पोते बनाउने, अचार बनाउने लगायतका महत्वपूर्ण तालिमहरु प्रदान गर्दै आएको छ।
दामन महिला अल्लो समुहले अल्लो र हेम्प बाट धागो निकाली कपडा बनाउदै आइरहेको छ।
प्रविधी हस्तान्तरण पछि समुहका अध्यक्ष रेश्मा गोपालीले प्रविधी पाएपछि व्यावसायिक रुपमा काम गर्न जागर बढेर आएको बताइन।