थाहा नगरपालिकामा नयाँ प्रमुख प्रशासकीय अधिकृत निरज पौडेलको स्वागत, सुरेन्द्र प्रधानको विदाइ

मकवानपुर । थाहा नगरपालिकामा नयाँ प्रमुख प्रशासकीय अधिकृत (प्र.प्र.अ.) निरज पौडेल को आगमनसँगै पूर्व प्र.प्र.अ. सुरेन्द्र प्रधान लाई विदाइ गरिएको छ। १० असोजमा आयोजित कार्यक्रममा नगर प्रमुख विष्णु बहादुर विष्ट र उपप्रमुख भरत गोपाली सहित वडाध्यक्ष, शाखा प्रमुख तथा कर्मचारीहरू उपस्थित थिए।

स्वागतपछि सम्बोधन गर्दै नवागन्तुक प्र.प्र.अ. पौडेलले विभिन्न स्थानीय तहमा प्राप्त अनुभवलाई थाहा नगरपालिकामा सेवा प्रवाह र सुशासनमा केन्द्रित गर्ने प्रतिबद्धता व्यक्त गरे। उनले जनप्रतिनिधि तथा कर्मचारीहरूको सहकार्यका माध्यमबाट नगरवासीलाई अझ प्रभावकारी सेवा दिने आश्वासन दिए।

कार्यक्रममा नगर प्रमुख विष्टले प्र.प्र.अ.हरूको बारम्बार हुने सरुवाले कामको निरन्तरतामा असर गर्ने गरेको बताउँदै, पदमा रहँदा थाहा नगरपालिकाका लागि उल्लेखनीय योगदान पुर्‍याएको भन्दै सुरेन्द्र प्रधानलाई धन्यवाद ज्ञापन गरे। साथै, नयाँ अधिकृत पौडेलसँग पनि समन्वय र सहकार्य गर्दै नगरको विकासमा अग्रसर हुने विश्वास व्यक्त गरे।

कार्यक्रममा सुरेन्द्र प्रधानले आफ्नो कार्यकालमा नगरवासी र जनप्रतिनिधिबाट पाएको साथ–सहयोगप्रति आभार प्रकट गर्दै थाहा नगरपालिकासँग आत्मीय सम्बन्ध रहिरहने बताए।

नयाँ नेतृत्वको आगमनसँगै थाहा नगरपालिकामा प्रशासनिक कार्यसम्पादन र सेवा प्रवाहमा थप गति आउने अपेक्षा गरिएको छ।