थाहा अस्पतालमा उत्कृष्ट कर्मचारी सम्मान, बिदाइ तथा तीज शुभकामना आदानप्रदान कार्यक्रम सम्पन्न

थाहा अस्पतालमा उत्कृष्ट कार्यसम्पादन गर्ने कर्मचारीलाई सम्मान गर्दै ‘फेरि भेटौँला’ तथा हरितालिका तीजको शुभकामना आदानप्रदान कार्यक्रम सम्पन्न भएको छ।
अस्पताल व्यवस्थापन समितिका अध्यक्ष नारायण लामाको अध्यक्षता तथा थाहा नगरपालिकाका प्रमुख प्रशासकीय अधिकृत निरज पौडेलको प्रमुख आतिथ्यतामा कार्यक्रम सम्पन्न भएको हो। कार्यक्रममा थाहा–३ का वडाध्यक्ष हिरेन्द्रकुमार रायमाझी, थाहा नगर स्वास्थ्य शाखा प्रमुख मेघराज बलामी, अस्पतालका प्रमुख डाक्टर जोनशोन विक, व्यवस्थापन समितिका सदस्यहरू उर्मिला गोपाली, नवराज थापा र कृष्णकुमार कार्कीलगायत सञ्चारकर्मी शम्भु अधिकारीको उपस्थिति रहेको थियो।
कार्यक्रममा अस्पतालमा उत्कृष्ट कार्य गर्ने मेडिकल अधिकृत डा. समाज गोपाली, हेल्थ असिस्टेन्ट राजन खड्का, अ.न.मी. निरीक्षक रिचा देव, सिनियर अनमी श्वेता पराजुली, ल्याब असिस्टेन्ट रमेश खड्का तथा कर्मचारी प्रदीप विष्ट र केशव घिमिरेलाई कदरपत्रसहित सम्मान गरिएको थियो। सम्मानित कर्मचारीहरूलाई प्रमुख अतिथि पौडेलले कदरपत्र प्रदान गर्दै सम्मान गरेका थिए।
कार्यक्रममा लामो समय अस्पतालमा सेवा गरी सेवानिवृत्त भएका रामकृष्ण खड्का र दिनेश थापालाई बिदाइ गरिएको थियो भने डा. कल्पना चौधरी र हेल्थ असिस्टेन्ट रचना शर्मालाई अस्पतालमा स्वागत गरिएको थियो।
कार्यक्रमलाई सम्बोधन गर्दै प्रमुख अतिथि निरज पौडेलले स्वास्थ्य सेवा प्रत्यक्ष रूपमा नागरिकको जीवनसँग जोडिएको महत्वपूर्ण सेवा भएकाले अस्पतालका कर्मचारीले आफ्नो जिम्मेवारीलाई सेवाभावका साथ निर्वाह गर्नुपर्ने बताए। उनले उत्कृष्ट कार्य गर्ने कर्मचारीलाई सम्मान गर्दा अन्य कर्मचारीलाई समेत अझ जिम्मेवार र प्रेरित भएर काम गर्ने वातावरण बन्ने उल्लेख गरे।
पौडेलले अस्पतालमा लामो समय सेवा गरेका कर्मचारीको योगदानको सम्मान गर्दै सेवानिवृत्त कर्मचारीलाई आगामी जीवनका लागि शुभकामना व्यक्त गरे। साथै नयाँ कर्मचारीलाई स्वागत गर्दै अस्पतालको सेवा प्रवाहलाई अझ प्रभावकारी, गुणस्तरीय र नागरिकमैत्री बनाउन सबै पक्षबीच सहकार्य आवश्यक रहेको बताए।
कार्यक्रममा हरितालिका तीजको अवसरमा शुभकामना आदानप्रदानसमेत गरिएको थियो।