थाहामा मनाइयो ६९ औँ राष्ट्रिय सहकारी दिवस

थाहा नगरपालिका सहकारी शाखाको आयोजनामा ६९ औँ राष्ट्रिय सहकारी दिवसको अवसरमा शुभकामना आदानप्रदान कार्यक्रम सम्पन्न भएको छ। नगर प्रमुख विष्णु बिष्टको अध्यक्षतामा आयोजित कार्यक्रममा सहकारी क्षेत्रसँग सम्बन्धित विभिन्न व्यक्तित्वहरूको उल्लेखनीय सहभागिता रहेको थियो।
कार्यक्रममा थाहा नगरपालिकाका प्रमुख प्रशासकीय अधिकृत निरज पौडेल, वडा नं. ५ का अध्यक्ष विष्णु बहादुर गुरुङ, पालुङ बहुउद्देश्यीय सहकारीका अध्यक्ष कृष्ण बहादुर बिष्ट, लालीगुराँस महिला बहुउद्देश्यीय सहकारीकी अध्यक्ष रिता प्रधान तथा सुखी भविष्य बचत तथा ऋण सहकारीका अध्यक्ष सुरेन्द्रमान प्रधानले शुभकामना मन्तव्य व्यक्त गरेका थिए। नगरभित्र रहेका विभिन्न सहकारी संस्थाका प्रतिनिधिहरूको पनि कार्यक्रममा उपस्थिति रहेको थियो।
कार्यक्रमलाई सम्बोधन गर्दै नगर प्रमुख विष्णु बिष्टले सहकारी क्षेत्रलाई स्थानीय आर्थिक विकासको महत्वपूर्ण आधारको रूपमा लिनुपर्ने बताउनुभयो। उहाँले भन्नुभयो, “सहकारीहरू उद्यमशीलता विकास, रोजगारी सिर्जना र वित्तीय पहुँच विस्तारका महत्वपूर्ण माध्यम हुन्। पारदर्शिता र उत्तरदायित्वसहित सञ्चालन गरिएमा सहकारीले समृद्ध समाज निर्माणमा ठुलो योगदान पुर्‍याउन सक्छ।” साथै उहाँले सहकारी संस्थाहरूलाई अनुशासित, विश्वसनीय र सदस्यमुखी भएर अगाडि बढ्न आग्रह गर्नुभयो।
हरेक वर्ष चैत्र २० गते मनाइने राष्ट्रिय सहकारी दिवस २०१३ सालमा चितवनको शारदानगरमा स्थापना भएको पहिलो सहकारी ‘बखान सहकारी’को स्मरणमा मनाइँदै आएको छ। यस वर्ष “उद्यमशीलता र पारदर्शिता: सहकारीको प्राथमिकता ” भन्ने मूल नारासहित देशभर विविध कार्यक्रमका साथ दिवस मनाइएको हो।
हाल देशभर करिब ३० हजार सहकारी संस्था सक्रिय रहेका छन्। सहकारी क्षेत्रले कुल गार्हस्थ्य उत्पादनमा करिब ३ प्रतिशत र वित्तीय पहुँच विस्तारमा १५ प्रतिशत योगदान पुर्‍याएको तथ्याङ्कले देखाउँछ।