थाहामा नागरिक सुनुवाई सहित लागू औषध तथा मदिरा नियन्त्रण सम्बन्धि अन्तरक्रिया

जिल्ला प्रहरी कार्यालय मकवानपुर र जिल्ला प्रशासन कार्यालयले थाहामा नागरिक सुनुवाई सहित लागू औषध तथा मदिरा नियन्त्रण सम्बन्धि अन्तरक्रिया कार्यक्रमको आयोजना गरेको छ ।

थाहा नगरपालिकाको समन्वयमा उक्त कार्यक्रमको आयोजना गरिएको हो । उक्त कार्यक्रममा मकवानपुरका प्रमुख जिल्ला अधिकारी स्किम श्रेष्ठको सभाध्यक्षता तथा थाहा नगरपालिकाका प्रमुख बिष्णु बिष्टको प्रमुख आतिथ्यतामा भएको हो ।
थाहा वडा न ३ मा रहेको बिकास घरको सभाहलमा भएको कार्यक्रमका प्रमुख अतिथी थाहा नगरपालिकाका प्रमुख बिष्णु बिष्टले मकवानपुरमा लागुऔषध कारोवार तथा ओसारपसारका घटना वृद्धि भइरहेको र दैनिक रुपमा लागुऔषध प्रयोगकर्ताको संख्या पनि बढ्दो क्रममा रहेको र जिल्ला लागू औषधी कारोबारको हव बन्दै गैरहेकोले चिन्ता संगै सुरक्षा चुनौती थपिएको बताए।

कार्यक्रममा जिल्ला प्रहरी कार्यालय मकवानपुरका प्रमुख प्रहरी उपरीक्षक बिश्वराज खड्काले जिल्लामा आर्थिक बर्ष २०८१/०८२ को चैत्र मसान्त सम्म ४ हजार ३ सय १७ किलो गाँजा,२० किलो २ सय ३१ ग्राम अफिम,४ सय २८ ग्राम खैरो हिरोइन,५१ किलो ७ सय १० ग्राम चरेस,कोरेक्स ३ सय ७७ बोतल,नाइट्राभेट ६० हजार ४ सय ५५ क्याप्सुल,डाइजापाम १६ सय ३२ एम्पुल,र लागुऔषध कारोबारमा प्रयोग भएको ३४ थान सवारीसाधन पक्राउ गरेको जानकारी दिए।
प्रमुख खड्काले यस आर्थिक बर्षको चैत सम्म १ सय ३९ वटा मुद्दा दर्ता गरि २ सय ८ जनालाई पक्राउ गरिएको जानकारी दिए।

जिल्ला प्रहरी कार्यालय मकवानपुरको अनुसार जिल्लामा १५ बर्ष देखि २५ बर्ष सम्म उमेर रहेका ५१ प्रतिशतले लागू औषधको प्रयोग गर्ने गरेको तथ्यांक रहेको छ भने २६ देखि ३५ बर्षका २९ प्रतिशत र ३६ बर्ष देखि माथीका २० प्रतिशत लागू औषध प्रयोग गर्ने गरेको छ।
जिल्लामा यो आर्थिक बर्षमा १ सय २० बिघा ४ कठ्ठा  क्षेत्रफलमा लगाइएको गाँजा र ३९ बिघा ८ कठ्ठामा लगाइएको अफिम नष्ट गरिएको विवरण प्रस्तुत गरियो।

कार्यक्रममा जिल्ला प्रशासन कार्यालयका सहायक प्रमुख जिल्ला अधिकारी राजेन्द्र प्रसाद कडेलले जिल्ला प्रशासन कार्यालय बाट सम्पादक हुने कार्यको बारेमा प्रस्तुतीकरण दिएका थिए।
तेसै गरि थाहा नगरपालिकाका प्रमुख प्रशासकीय अधिकृत सुरेन्द्र प्रधानले पालिकाले गरेका कार्यसम्पादन र प्रगती प्रतिवेदन प्रस्तुत गरेका थिए।

नागरिक सुनुवाइ कार्यक्रममा उठेका प्रश्नको जबाफ दिदै प्रमुख जिल्ला अधिकारी श्रेष्ठले अरुको भविष्यमाथी खेलवाड गर्नेलाई बिचरा,कठै भन्ने छुट कसैलाई नभएको बताउदै लागू औषधमा निर्मम भएर अगाडि बढ्नुपर्ने बताउनुभयो वहाँले विशेषगरि स्थानीय तहले लागु औषध खेती र कारोबार रोक्न ध्यान दिनुपर्नेमा जोड दिए।
उनले नेपाल सरकारले कानुन नबनाउन्जेल गाजा रोप्नु,खानु,ओसारपसार गर्नु सबै अबैध रहेको बताउदै यस्मा संका नगर्न आग्रह गर्नुभयो।

कार्यक्रममा विशेषत: नागरिकको तर्फबाट थाहा नगरमा ईलाका प्रशासन कार्यालय,नागरिकता र राष्ट्रिय परिचयपत्र शिविर र लागु औषध कारोबारी पक्राउमा प्रहरीको भुमिका सम्बन्धि प्रश्न गरेका थिए।
उठेका प्रश्नको जबाफ जिल्ला प्रहरी प्रमुख बिश्वराज खड्का,प्रमुख जिल्ला अधिकारी स्किम श्रेष्ठले उत्तर दिनुभएको थियो।
कार्यक्रममा ससस्त्र प्रहरी बलका प्रहरी उपरीक्षक सन्तोष बिक्रम शाह,राष्ट्रिय अनुसन्धान मकवानपुरका उप अनुसन्धान निर्देशक प्रज्वल खड्का,थाहा नगरपालिकाका उपप्रमुख भरत गोपाली,राजनैतिक दलका प्रमुख हरु,जनप्रतिनिधि,कर्मचारी,टोल सुधार समितिका प्रतिनिधि लगायत स्थानीयको उपस्थिति रहेको थियो।