थाहामा आँखा स्वास्थ्य सेवा विस्तारका लागि पालिका र आँखा केन्द्रबीच सहकार्यमा जोड

थाहा नगरमा तिलगंगा सामुदायिक आँखा केन्द्र पालुङ र हेटौंडा सामुदायिक आँखा केन्द्रको आयोजनामा स्थानीय परियोजना सल्लाहकार समितिको बैठक सम्पन्न भएको छ।
थाहा नगरपालिकाका प्रमुख विष्णु विष्टको अध्यक्षतामा सम्पन्न बैठकमा हेटौंडा आँखा अस्पतालका प्रशासन तथा वित्त प्रमुख उमेश महत र बाह्य विभाग प्रमुख कृष्ण कुशाहले सहजीकरण गरेका थिए।
कार्यक्रममा थाहा नगर उपप्रमुख भरत गोपाली, प्रमुख प्रशासकीय अधिकृत नीरज पौडेल, स्वास्थ्य शाखा प्रमुख मेघराज बलामी, तिलगंगा सामुदायिक आँखा केन्द्र पालुङका प्रमुख विवेक राजथलालगायत विभिन्न संघसंस्थाका प्रतिनिधिहरूको उपस्थिति थियो।
बैठकमा आँखा केन्द्रले आर्थिक बर्ष २०८२/०८३ मा प्रदान गरेका सेवा तथा आगामी योजनाबारे जानकारी गराइएको थियो। सो अवधिमा ४ हजार ४ सय ३२ जना बिरामीको आँखा परीक्षण, ९७ जनाको शल्यक्रिया तथा १ हजार ३ सय १९ जनाको आई स्क्रिनिङ गरिएको जानकारी दिइएको छ।
त्यस्तै, आँखा केन्द्रमार्फत ११० जना विद्यालयका विद्यार्थीलाई निःशुल्क चश्मा वितरण गरिएको तथा २२ जना शिक्षक र ४२ जना महिला स्वास्थ्य स्वयंसेविकालाई आँखा स्वास्थ्यसम्बन्धी तालिम प्रदान गरिएको जनाइएको छ।
गत आर्थिक बर्षमा ८८ जनाको निःशुल्क शल्यक्रिया तथा ४२ जनाको सशुल्क फेको प्रविधिबाट शल्यक्रिया गरिएको जानकारी गराइयो।
आगामी दिनमा फेको प्रविधी बाट सल्यक्रिया गर्नको लागि पालिकाको सहयोग आवश्यक रहेको बैठकमा प्रस्तुत गरिएको थियो।
त्यसैगरी, आँखा केन्द्रमा बिरामीको सुविधाका लागि व्यवस्थित शौचालय तथा बिरामी आराम कक्ष निर्माण गर्न पनि पालिकाको सहयोग आवश्यक रहेको विषय बैठकमा उठाइएको थियो।
बैठकमा आँखा स्वास्थ्य सेवाको पहुँचलाई थप प्रभावकारी बनाउँदै स्थानीयस्तरमै गुणस्तरीय सेवा विस्तार गर्न पालिका, आँखा केन्द्र तथा सरोकारवाला संघसंस्थाबीच सहकार्यलाई निरन्तरता दिने विषयमा समेत छलफल भएको थियो।