थाहाको आग्रामा मिनि महोत्सव तथा पालिका स्तरीय भलिबल सुरु,

थाहा नगरपालिकाको वडा न ८ ऐसेलुखर्कमा मिनी महोत्सव सहित अन्तर पालिका स्तरीय भलिबल प्रतियोगिता सहित बिबिध सांस्कृतिक कार्यक्रम आज बाट सुरु भएको छ।
नमुना जनजागरण युवा क्लव र खेलकुद विकास समिती थाहा ८ को आयोजनामा प्रतियोगिता सहित बिबिध कार्यक्रमको उद्घाटन थाहा नगरपालिकाका प्रमुख बिष्णु बिष्टले गरेका छन।
महोत्सवको उद्घाटन गर्दै नगर प्रमुख बिष्टले गाउँ केन्द्रीत यस्ता मेला महोत्सवले ग्रामीण भेगको पर्यटन प्रवर्दनमा टेवा पुग्ने बताउदै आग्रामा रहेको पर्यटकीय स्थलको प्रचारप्रसारमा पनि सहयोग पुग्ने बताउनुभयो।
उद्घाटन कार्यक्रमलाई शुभकामना दिदै थाहा नगरका प्रमुख प्रशासकीय अधिकृत सुरेन्द्र प्रधानले खेलले अनुशासन सिकाउने हुँदा अनुसासित भएर खेल खेल्न आग्रह गर्दै खेल पर्यटनले पनि थाहा लाई चिनाउन मद्दत पुग्ने बताए।
थाहा ८ का वडा अध्यक्ष हेम कुमार थिङले मेला,तथा खेलकुद प्रतियोगिताले पछाडी परेको आग्रा लाई चिनाउन मद्दत पुग्ने बताउदै कार्यक्रम सफल बनाउन अहोरात्र खट्ने सबैलाई धन्यवाद प्रदान गरे।
नमुना जागरण युवा क्लवको अध्यक्ष जयराम घलानको अध्यक्षतामा सम्पन्न उद्घाटन समारोहमा थाहा नगर खेलकुद विकास समिती संयोजक टिकाराम स्याङ्तान,वडा न ३ का अध्यक्ष हिरेन्द्र कुमार रायमाझी,नेकपा एमाले जिल्ला सदस्य डम्बर लामा,लगायतका उपस्तिथि रहेको थियो।

आग्राको पर्यटनलाई चिनाउनको लागि महोत्सव आयोजना गर्न लागिएको आयोजक समितिका सल्लाहकार रामकुमार घलानले बताउनुभयो।
घलानका अनुसार हाल थाहा नगरपालिकाको वडा न ७ र ८ तथा तत्कालीन आग्रा गाबिसमा रहेको पौराणिक,ऐतिहासिक तथा धार्मिक पर्यटकिय स्थलहरुको प्रचार प्रचार र आन्तरिक पर्यटन प्रवर्द्धन गर्न महोत्सव आयोजना गर्न लागिएको बताए।
आग्रामा डाडाबास पार्क,स्तम्भ डाडा बुद्ध पार्क,सप्तकन्या गुफा,काला कण्ठेश्वर महादेवको मन्दिर,गोक्सेखानी भग्नावसेस दरबार,बथानचुली झण्डाचुली,उन्यु चौर,कैलाश डाडा,६४ ज्योतिर लिङ्ग मध्यको एक कुटेश्वर महादेव,र नेपालकै तेस्रो झोलुङे पुल अवलोकन तथा घुमफिर गर्न सकिने घलानले बताए।
आयोजकले दिएको जानकारी अनुसार २८६१ औं सोनाम ल्होछारको अवसरमा कैलाश गाउँपालिका,राक्सिराङ गाउँपालिका,थाहा नगरपालिका,र थाक्रे गाउँ पालिका स्तरिय भलिबल प्रतियोगिता ७ वटा टिम खेलकुद विकास समिती थाहा ३ र ५,आयोजक निलो र रातो,ससक्त युवा क्लव,सल्ले राम्चे युवा क्लव र चण्डेश्वरी युवा क्लवको सहभागिता रहेको छ।
 पौष २८ गते देखि माघ २ गते सम्म थाहा नगरपालिका वडा न ८ को ऐसेलुखर्कमा कार्यक्रम हुने आयोजकले जानकारी दिएको छ।
राष्ट्रिय कलाकारहरु गायिका शान्ता रानी परियार,जितु लोप्चन,बाबुकृष्ण परियार,सानू केसी,सर्मिला गुरुङ(सरु),रजनी लामा र डान्सर हरु ममता रानामगर,पुजा सुनार, सविना राई,उद्घोषक पिम्सरा आले मगर र राममाया वाइवा सहित स्थानीय कलाकारहरुको बेजोड प्रस्तुती रहने आयोजकले जनाएको छ।
कार्यक्रममा तामाङ खाना,तामाङ संस्कृति झल्कने विभिन्न झाकी सहित बिबिध स्टलहरु रहेको छ।
महोत्सव आयोजनाबाट खेलाडी उत्पादन र पर्यटकीय क्षेत्रको उत्थान हुने आयोजकको बिश्वास रहेको छ।