थाहाका महिला जनप्रतिनिधिहरु नेतृत्व विकास तालिम लिदै

थाहा नगरपालिकाले आफ्ना महिला जनप्रतिनिधिका लागि नेतृत्व विकास एवं उद्घोषणसम्बन्धी चार दिने तालिमको सुरु गरेको छ ।

महिला बालबालिका तथा ज्येष्ठ नागरिक शाखाद्वारा आयोजित चारदिने सो तालिममा वडा नं १ देखि १२ सम्मका महिला जनप्रतिनिधिको सहभागिता रहने छ । तालिम कार्यक्रम यही मंसिर ११ गते सञ्चालन भएर १४ गते समापन हुने छ ।

तालिम उद्घाटनको अवसरमा थाहा नगरपालिकाका प्रमुख बिष्णु बिष्टले संवैधानिक प्रावधानअनुसार स्थानीय पालिकामा महिला जनप्रतिनिधिको सार्थक र नेतृत्वदायी भूमिका कमजोर नहोस् भन्ने उद्देश्यले तालिम आयोजना गरिएको बताए।

सुशासन, इमानदारिता, पारदर्शिता र काम गर्ने उजागर महिला जनप्रतिनिधिको छवि बनेको जनाउँदै उनले यस्ता तालिम तथा कार्यक्रमले यसलाई मजबुत तुल्याउने बताए।

तेसै गरि उपप्रमुख भरत गोपालीले पालिकामा समयसापेक्ष रूपमा महिला जनप्रतिनिधिलाई क्षमता विकास गराउन जरुरी हुने बताए । उनले विकास निर्माण, सुशासन, सञ्चार, स्थानीय निकाय सञ्चालन, सूचनाको हक लगायतका विषयमा जानकारी पाएपछि क्षमता विकासमा ठूलो सहयोग पुग्ने बताए ।

 नगरपालिका प्रमुख प्रशासकीय अधिकृत कृष्ण गिरीले सुशासन र समृद्धि सरकारको लक्ष्य भएकाले स्थानीय तहमा महिला नेतृत्वलाई कसरी प्रशिक्षित गर्न सक्छौँ भन्नेबारेमा सोच्न जरुरी भएको बताए। 

तालिमका सहभागीलाई सार्वजनिक भाषणकला, उद्घोषण कला, क्षमता अभिवृद्धि, नेतृत्व विकासका साथै लैङ्गिक, न्यायिक क्षेत्रका विविध विषयमा तालिम प्रदान गरिने महिला बालबालिका तथा ज्येष्ठ नागरिक शाखाकी शाखा प्रमुख प्रतिमा मोक्तानले बताए। यस प्रकारका तालिमका लागि माग भई आएकाले तालिम प्रदान गरिएको उनको भनाइ छ ।

नगरपालिकाले यसअघि महिला जनप्रतिनिधि हरुलाइ मागअनुसारका विभिन्न तालिम दिएको थियो । महिला बालबालिका जेष्ठ नागरिक तथा अपांग परिचयपत्र समितिका संयोजक अनिता बलको अध्यक्षतामा सम्पन्न उद्घाटन सत्रमा नगर प्रमुख बिष्णु बिष्ट,उपप्रमुख भरत गोपाली,प्रमुख प्रशासकीय अधिकृत कृष्ण गिरी,सामाजिक विकास शाखा संयोजक दिनेश बल,सुशासन समितिका संयोजक बिष्णु बहादुर गुरुङ,नेकपा एमाले थाहा नगरकी महिला नेतृ कल्पना बलामी,नेपाली काङ्ग्रेस थाहाकी महिला नेतृ राममाया खत्रीले कार्यक्रम सफलताको शुभकामना दिएका थिए।