थाहाका किसान आन्दोलित,किसानको मागप्रति आफ्नो पनि ऐक्यबद्धता :- नगर प्रमुख बिष्ट

 मकवानपुरको उत्तरी क्षेत्रमा रासायनिक मल नपाएपछि किसानहरु आन्दोलनमा उत्रेका छन् । आलु लगाउने समय नजिकिँदै गर्दा मलको अभावका कारण चिन्तित बनेका थाहा नगरपालिकाको किसान आन्दोलनमा उत्रिएका हुन् । मलको सहज आपूर्ति गर्न थाहा नगरपालिकाका किसान आन्दोलन संघर्ष समितिले आज बिहीबार नगरपालिकामा ध्यानाकर्षण पत्र बुझाएको छ । नेपाल कृषि प्रधान देश भएपनि विगत केही बर्षदेखि मलको अभाव हुने गरेको छ ।

आधुनिक कृषि प्रणाली र व्यवसायी रुपमा किसान आत्मनिर्भर हुनुपर्ने अवस्थामा उन्नत जातको बीउ, मल र बजार व्यवस्थापन जस्ता सामान्य कुरामा समेत राज्य संवेदनशील हुन नसक्दा मुलुक भरका किसान मर्कामा परेको ध्यानाकर्षण पत्रमा उल्लेख छ । राज्य किसानप्रति जवाफदेही नहुँदा सरकारबाट निश्चित मुल्य निर्धारण गरिएका युरिया, डिएपि जस्ता मलहरू तेब्बर मुल्य तिरेर खरिद गर्नुपर्ने बाध्यता रहेको उनीहरुले आरोप लगाएका छन् । ध्यानाकर्षण पत्रमा भनिएको छ, “मकवानपुरको उत्तरी क्षेत्रमा माघ महिनाको पहिलो हप्तादेखि आलु लगाउनुपर्ने सिजन प्रारम्भ हुन्छ । आलुको लागि प्रति किसान ६ बोरादेखि १५ बोरासम्म मल आवश्यक पर्छ । समानुपातिक मल वितरणको नियमले प्रतिकिसान १० किलो मल मात्रै प्राप्त हुन्छ । जुन आलु बालीको लागि प्रयाप्त होइन ।” मल आएपछि त्यसको बाडफाँड आवश्यकता र ओैचित्यको आधारमा गर्नुपर्ने उनीहरुको माग छ । किसानको समस्यालाई मध्यनजर गरी थाहा नगरपालिकाले आम किसानको हकहितको निमित्त काम गरोस् भन्दै संघर्ष समितिको संयोजक लक्ष्मण बर्तौलाले उक्त ज्ञापनपत्र वाचन गर्दै नगर प्रमुख बिष्णुबहादुर बिष्टलाई ज्ञापनपत्र बुझाएको हो । बर्तौलाको नेतृत्वमा थाहा नगरपालिका वडा नम्बर ३ बाट प्रारम्भ भएको आन्दोलनमा आसपासका जनसमुदायको व्यापक उपस्थिति रहेको थियो ।आन्दोलनलाई सम्बोधन गर्दै लक्ष्मण बर्तौलाले भन्नू भयो - यो आरम्भ हो अन्त्य होइन ।किसानको माग र मुद्दालाई सम्बन्धित निकायले संवेदनशील ढंगले नहेरी बेवास्ता गरे आन्दोलन थप चर्कने र देशव्यापीरूपमा थप अन्य कार्यक्रम घोषणा गरिने जानकारी दिनुभयो । ध्यानाकर्षण पत्र बुझ्दै थाहा नगरपालिकाका प्रमुख बिष्णु बिष्टले किसानहरूको माग जाहेज रहेको र सो अभियानमा नगरपालिकाको समेत ऐक्यबद्धता रहेको कुरा बताउदै राज्यको नीतिनिर्माताले गर्दा किसानहरुले दुख पाइरहेको स्विकार्दै मलको आपूर्ति सहज र किसान समक्ष सहज बितरणको लागि आफुनै अगाडि बढेर किसानहरु संगै आन्दोलनमा सहभागी हुने मेयर बिष्णु बिष्टले किसानहरूलाई बताउँनु भएको थियो साथै वहाँले थाहा नगरपालिकाको लागि कोटा भन्दा बढी मल लेराउनको लागि पहल भैरहेको बताउदै मलको विषय राष्ट्रिय समस्या भएकोले आफुभन्दा माथिल्लो निकायमा यो विषयलाई जोडका साथ लैजाने बताएका थिय।