ऋषेश्वर मन्दिर क्षेत्रमा एकादशी जात्रा व्यवस्थित गर्न मदिरा र माछामासु निषेध ‎

थाहा, मकवानपुर ।

‎थाहा नगरपालिका वडा नम्बर ४ मा अवस्थित प्रसिद्ध ऋषेश्वर महादेव मन्दिरमा लाग्ने एकादशी जात्राको व्यवस्थापनका लागि आवश्यक तयारीकोलागि सिमभन्ज्याङमा बृहत् छलफल गरिएको छ।

‎बैठकले ऋषेश्वर मन्दिर प्रवेशद्वारदेखि मन्दिर परिसरसम्म माछामासु र मदिरा निषेध गरिएको छ। आउँदो कार्तिक १५ गते पर्ने ठूली एकादशी (हरिबोधनी एकादशी)को अवसरमा लाग्ने जात्रालाई लक्षित गर्दै  बैठकले यस्तो निर्णय गरेको हो।

‎जात्रा सुव्यवस्थित रूपमा सञ्चालन गर्नका लागि विभिन्न संयोजक तथा जिम्मेवारी तोकिएको बैठकले निर्णय गरेको हो।

‎बैठकका अनुसार स्वयंसेवक व्यवस्थापनका लागि गणेश लामालाई संयोजक तोकिएको छ। परम्परागत रूपमा पाण्डुकेश्वर महादेवको मुकुट ऋषेश्वर लैजाने ल्याउने व्यवस्थाका लागि पाण्डुकेश्वर क्षेत्र विकास समितिका सदस्य कमल केसीलाई जिम्मेवारी दिइएको छ। त्यस्तै मन्दिर प्रवेशद्वार र बजार व्यवस्थापनका लागि सुमन भुजेल संयोजक तोकिएका छन्।

‎बैठकमा नगर प्रमुख विष्णु बहादुर विष्टले ऋषेश्वर क्षेत्र विकास समितिले नै जात्राको नेतृत्व लिनुपर्ने बताए। उहाँले “स्वयंसेवक सञ्चालनदेखि मन्दिर भेटी संकलन, बजार व्यवस्थापनलगायतका सबै कार्य एकद्वार प्रणालीबाट गर्नुपर्छ,” भन्दै नगरपालिकाले कार्यविधि तयार गरी आधिकारिक रूपमा क्षेत्र विकास समिति गठन गरिसकेकाले सबै सरोकारवाला निकायबीच समन्वय गरी ऋषेश्वर क्षेत्रको प्रवर्द्धनात्मक कार्य गर्नुपर्ने धारणा राख्नुभयो।

‎त्यस्तै, नगर उप–प्रमुख भरत गोपालीले ऐतिहासिक र परम्परागत रूपमा चल्दै आएको जात्राको सञ्चालन धार्मिक सहिष्णुतासहित गर्नुपर्ने बताउँदै क्षेत्र विकास समितिको भूमिका अझ सुदृढ हुनुपर्नेमा जोड दिनुभयो।

‎ऋषेश्वर क्षेत्र विकास समितिका अध्यक्ष विनोद लामाको अध्यक्षतामा ११ कार्तिकमा बसेको बैठकले एकादशी जात्रालाई अझ व्यवस्थित रूपमा सञ्चालन गर्ने निर्णय गरेको हो।

‎उक्त बैठकमा नगर प्रमुख विष्णु बहादुर विष्ट, उप–प्रमुख भरत गोपाली, वडा नम्बर ४ का वडा अध्यक्ष नारायण लामालगायत सरोकारवाला निकायका प्रतिनिधिहरूको विशेष उपस्थिती रहेको थियो।

‎बैठकले इलाका प्रहरी कार्यालय पालुङ र नगर प्रहरीलाई ट्राफिक व्यवस्थापन र सुरक्षाको जिम्मेवारी पनि दिने निर्णय गरेको छ।

‎

‎