आग्रामा वडा स्तरीय भलिबल प्रतियोगिता सम्पन्न, उपाधि पुपु मेहेन्दो युवा क्लबलाई 

सानोबाबु मुक्तान÷ थाहानगरपालिका वडा नं ७ चौवासको थुम्किडाँडामा आईतबार सशक्त युवा क्लबको आयोजनामा भएको साविक आग्रा गाउँविकास समिति वडा स्तरीय भलिबल प्रतियोगिताको उपाधि पुपु मेहेन्दो युवा क्लबले हासिल गरेको छ । प्रतियोगितामा सेभेन स्टार युथ क्लब– सल्लेलाई ३–० को सोझो सेटले पराजित गर्दै पुपु मेन्दो युवा क्लव चिसापानीले उपाधि हासिल गरेको हो । सशक्त युवा क्लब चौवासले साईनिङ स्टार्स युवा क्लव बतासेलाई ३–१ को सेटले पराजित गर्दै तृतिय भएको छ ।
 प्रतियोगिता समापनसंगै थाहा नगरपालिकाका उपप्रमूख खड्ग गोपालीको प्रमूख आतिथ्यतामा एक समारोहको विचमा विजेता खेलाडिहरुलाई पुरस्कार वितरण गरिएको छ । पुरस्कार वितरण समारोहमा बोल्दै नगर उपप्रमूख गोपालीले नगरपालिकाले खेलकुदको दिगो विकासका लागि सोच बनाईरहेको र हरेक क्षेत्रमा भईरहेका विविध प्रतियोगितामा नगरपालिकाको प्रतिनिधित्व तथा चासो चिन्तन भईरहेको बताउनुभयो । थाहा नगरपालिका पर्यटनसंग जोडिएको र खेलकुद पनि प्रत्यक्ष रुपमा पर्यटन संग जोडिएको खेलकुदको उचित विकासका लागि आफू संगै सिंगो नगरनै सकरात्मक रहेको पनि बताउनुभयो । आगामी दिनमा विविध खेलको आयोजना गरेर मात्रै हैन खेललाई प्रभावकारी तरीकाले अगाडि बढाउनका लागि विविध खेल कोच सहित खेललाई अगाडि बढाउनमा आफूले जोड दिईरहेको पनि बताउनुभयो ।
सशक्त युवा क्लव समूहको अध्यक्ष सुवित्र थिङको अध्यक्षतामा भएको कार्यक्रममा विशिष्ट अतिथि थाहा नगरपालिका वडा नं ७ का वडा सदस्य तथा खेलकुद विकास समिति वडा नं.–७ का संयोजक दिपेन्द्र कुमार थिङले खेलकुद विकासका लागि खेलकुद आयोजना पनि प्रमूख रहेको भन्दै आउँदो विजया दशमीको अवसरमा नगरपालिका वडा स्तरीय प्रतियोगिताको आयोजना गरेर खेलाडि छनौट गरी छनौट खेलाडिको विकासका लागि उचित सोच निर्माण गर्नेमा जोड दिनुभयो ।  प्रतियोगितामा प्रथम हुने टिमले नगद रु २० हजार सहित शिल्ड मेडल प्रमाण पत्र, द्धितिय हुनेले १५ हजार शिल्ड मेडल प्रमाण पत्र र तृतिय हुने टिमले नगद रु १० हजार सहित शिल्ड मेडल र प्रमाण पत्र प्राप्त गरेका छन् । प्रतियोगिताको निर्णायकको भूमिका सरस्वति वालबोधनि माविका उमाकान्त चौधरी र विनयबाबु स्मृति प्रतिष्ठानका किरण गिरीले निभाएका छन् । प्रतियोगितामा पुपु मेन्दो युवा क्लवका राजाराम स्याङ्तान उत्कृष्ट खेलाडि, सशक्त युवा क्लवका राजकुमार थिङ उत्कृष्ट ब्लकर, सेभेन स्टार्सका अनिल मोक्तान उत्कृष्ट लिव्रो, सशक्त युवा क्लवका विशाल मुक्तान उदयमान खेलाडि, र साईनिङ स्टार्स युवा क्लवका एकराज थिङ उत्कृष्ट लिफ्टर घोषित भएसंगै पुरस्कृत भएका छन् । 
पुरस्कार वितरण समारोहमा थाहा नगरपालिका वडा नं ७ कांग्रेस सभापति शिवराज थिङ, सुन्दरी देवी माविका अध्यक्ष विनायक गोले, थाहा कला केन्द्रका अध्यक्ष सानोबाबु मुक्तान, थाहा नगरपालिका वडा नं ३ का कांग्रेस सभापति विक्रम गोपाली, पूर्व गाविस अध्यक्ष बुद्धिलाल थिङले मन्तव्य व्यक्त गरेका थिए । साहित्यप्रेमी भिमसेन मोक्तानले सञ्चालन गरेको कार्यक्रममा नेपाली कांग्रेसको थाहा नगर सदस्य विर्जुलाल थिङ, हिमशिखर बचत तथा ऋण सहकारी संस्था लि. का अध्यक्ष रामचन्द्र थिङ, डाईनामिक एकेडेमीका नविना बल लगायतका उपस्थिति रहेको थियो ।