बागेश्वरी मा.वि. काे सुविधा सम्पन्न भवन हस्तान्तरण

मकवानपुरको थाहा नगरपालिका–११ स्थित टिस्टुङमा रु. ९ करोडमा निर्मित सुविधा सम्पन्न विद्यालय भवन विद्यालयलाई हस्तान्तरण गरिएको छ । अत्याधुनिक विद्यालय भवन हस्तान्तरण भएसँगै बागेश्वरी माध्यमिक विद्यालयका विद्यार्थीहरू ५ वर्षअघि भूकम्पले भत्किएको भवनमा पढ्नुपर्ने बाध्यताबाट मुक्त भएका छन् । २०७२ सालमा आएको भूकम्पले विद्यालय भवन क्षतिग्रस्त बनेपछि राष्ट्रिय पुनःनिर्माण प्राधिकरणले जापानी सहयोग नियोग (जाइका)को ऋण सहयोगमा उक्त विद्यालयको भवन निर्माण गरेको हो । जाइकाको आठ करोड ९५ लाख रुपियाँको लागतमा तीन तलाको तीनवटा विद्यालय भवन निर्माण गरिएको छ । करिब पाँच रोपनी जग्गामा निर्माण सम्पन्न विद्यालय भवनमा विज्ञान ल्याब, पुस्तकालय, कम्प्युटर कक्षा, ईसीडी कक्षाका लागि फर्निचर लगायतका पूर्वाधार तयार छन् । जिल्ला समन्वय समिति मकवानपुरका प्रमुख रघुनाथ खुलाल, थाहा नगरपालिकाका प्रमुख लवशेर विष्ट, जिल्ला आयोजना कार्यान्वयन इकाइ(क्षिक्षा) प्रमुख बद्रिबहादुर पाठक, नगर शिक्षा अधिकारी शोभाकर रेग्मी, परापर्शदातृ संस्थाका केन्द्र प्रमुख नरेश आचार्य लगायतको सहभागितामा विद्यालय भवन हस्तान्तरण गरिएको हो । समयमै विद्यालय भवन निर्माण गरेकोमा स्थानीयले निर्माणको ठेक्का लिएको स्वच्छन्द–खानी जेभी कम्पनीलाई धन्यवाद दिएका छन् । विद्यालयका अध्यक्ष किरणमान बलले नयाँ विद्यालय भवन निर्माणसँगै भूकम्पले क्षतिग्रस्त विद्यालय भवन र टहरामा त्रासमा पढ्नु र पढाउनु पर्ने बाध्यता हटेको बताउनुभयो । विद्यालयका प्रधानाध्यापक वीरमान स्याङ्तानले नवनिर्मित ३ वटा भवनमध्ये २ वटा भवनका १८ वटा कोठामा कक्षा संचालन गरिने र एउटा भवन प्रशासनिक लगायतका कार्यमा प्रयोग गरिने बताउनु भयो ।