दुबै मिर्गौला फेल भएकी स्वास्थ्य स्वयमसेविकाको उपचारमा अार्थिक समस्या

 मकवाननपुरको थाहा नगरपालिका-२ (पालुङ)की बबिता ढकाल सँधै अरुको स्वास्थ्यकै चिन्ता गरेर हिँडिन् । स्थानीय क्षेत्रमा स्वास्थ्य स्वयमसेविकाको रुपमा लामो समय सेवा गरेकी ढकाललाई अहिले आफ्नै स्वास्थ्यले धोका दिएको छ । दुबै मिर्गौलाले काम नगरेपछि उनी अहिले स्वास्थ्य र अार्थिक समस्यासँग जुध्दैिछन् ।

अधिकांश समय अस्पतालमै बिताउन बाध्य भएकी उनी हाल जीवन-मरणको दोसाँधमा छिन् । काठमाडौं आएर उपचारका लागि उनले झण्डै ७ लाख रुपैयाँ सकिसकिन् । अब उपचार गर्न घरघँडेरी पनि बेच्ने अवस्था आएको उनको परिवारको गुनासो छ ।मिर्गौला प्रत्यारोणका लागि पनि ठूलो खर्च लाग्ने भएपछि परिवार कसरी रकम जुटाउने भन्ने चिन्तामा छन् ।आर्थिक अभाव चर्किएपछि उनको उपचार गर्न नै समस्या भएको छ । नियमित डायलासिसका लागि औषधि किन्न पनि रकम जुटाउन परिवारलाई हम्मे-हम्मे परेको छ । कसैले ऋण पत्याउन छाडेपछि बबिताले आर्थिक सहायताका लागि सबैसमक्ष अपील गरेकी छिन् ।‘लामो समय गाउँघरमा अरुको स्वास्थ्य बिग्रेला भन्ने चिन्ता गरेर हिँड्नुभयो । अहिले आफ्नो स्वस्थ्यमा समस्या पर्दा सहयोग जुटाउन सकिएन,’ बबिताका छोरी विद्याले अनलाइनखबरसँग भनिन्,’सबैले सक्दो सहयोग गरिदिनु भए ममीलाई उपचार गर्न सकिन्थ्यो ।’२०७१ सालादेखि नै बबिताको स्वास्थ्य बिग्रिएको थियो । तर पनि उनी निरन्तर गाउँमा सेविकाका रुपमा खटिएकी थिइन् । तर, पछिल्ला महिनाहरुमा उनलाई धेरै असहज भएको छ । त्रिबि शिक्षण अस्पतालमा उपचार गराइरहेकी बबिता आफू छिटै निको भएर फेरि गानउँघरमा सेवामा फर्किन चाहेको बताउँछिन् ।‘म निको भएपछि फेरि गाउँमै फर्किएर सेवा नै गरिरहन चाहन्छु,’ उनले भनिन्,’तर, पैसा नभएर धेरै समस्या भयो । हामी गरिबमाथि नै यस्तो बज्र पर्‍यो ।’बबिताका श्रमिान देबचन्द्र पनि आर्थिक समस्याका कारण उपचारमा उल्झन आउने अवस्था आएको निकै चिन्तित छन् ।

बबितालाई सहयोग गर्न चाहानेले नेपाल बैंकको खाता नम्बर ०९३०१०००९६४२३६०००००१मा  सहयोग रकम जम्मा गर्न सकिने छ । उनलाई सहयोग गर्न ९८४५०७२३१८ मा सम्पर्क पनि गर्न सकिनेछ ।