थाहा नगर निशुल्क शिक्षा घोषणाको लागि प्रधानाध्यापकहरु संग अन्तरक्रिया

थाहा नगरपालिकाले नयाँ शैक्षिक सत्र सुरू हुने समय तथा नयाँ भर्नाका लागि गरिने घरदैलो कार्यक्रममार्फत विभिन्न कारण विद्यालय नपुगेका बालबालिकाको सूक्ष्म रुपमा लगत सङ्कलन गर्ने भएको छ ।
शैक्षिक सत्र २०८१ जेष्ठ महिनाको दोस्रो हप्तामा थाहा नगरपालिकाले " अनिवार्य तथा निशुल्क शिक्षा घोषणा" गर्ने तयारी स्वरुप अनिवार्य तथा निःशुल्क शिक्षा कार्यान्वयन नगर घोषणाको निम्ति नगर शिक्षा शाखाले थाहा नगरपालिका भित्र रहेका विद्यालयका प्रधानाध्यापकहरु बिच अभिमुखिकरण कार्यक्रम गरेको छ । 

कार्यक्रमलाई सम्बोधन गर्दै थाहा नगर शिक्षा शाखा प्रमुख माधवविक्रम मल्लले कुनै पनि बालबालिका शिक्षाबाट बञ्चित हुन नपरोस् भन्ने उद्देश्यका साथ सञ्चालित अनिवार्य तथा निःशुल्क शिक्षा नगरपालिकामा लागू गरिएको बताए । उनले पालिका भित्रका सबै वडाहरुमा पनि अभियान संचालन नगरपालिका नै अनिवार्य तथा निःशुल्क शिक्षा कार्यान्वयन घोषणा गरिने बताए । 

थाहा नगर शिक्षा शाखा अधिकृत सुर्य बहादुर थिङले सहजीकरण गर्नुभएको कार्यक्रममा थाहा नगरपालिका सामाजिक विकास शाखा प्रमुख अनिल लामिछाने, रोजगार संयोजक कुमार नेगी, सूचना प्रविधि शाखा प्रमुख भगिरथ कार्की, सूचना अधिकारी सुरजकुमार भुजेल, नगर प्रमुखका प्रेस संयोजक शम्भू अधिकारी, एमआइएइस फिल्ड सहायक अच्युत विडारी  लगायतका थाहा नगरपालिका भित्र रहेका विद्यालयका प्रधानाध्यापक तथा शिक्षक प्रतिनिधिहरुको उपस्थिति रहेको थियो।
चालु आर्थिक वर्षका लागि मकवानपुरगढी गाउँपालिका र थाहा नगरपालिकालाई अनिवार्य तथा निःशुल्क शिक्षा कार्यक्रम सञ्चालनका लागि बागमती प्रदेश सरकारले छनौट गरेको थियो ।