थाहा नगरपालिकामा वातावरणमैत्री झोला निर्माण तालिम सम्पन्न, १७ जना महिलाको सक्रिय सहभागिता

मकवानपुरको थाहा नगरपालिकामा सञ्चालित ३० दिने वातावरणमैत्री झोला निर्माण तालिम सफलतापूर्वक सम्पन्न भएको छ। उद्योग तथा वाणिज्य कार्यालय हेटौंडाको आयोजना र थाहा नगरपालिका वडा नं. ३ तथा थाहा नगर उद्योग वाणिज्य संघको व्यवस्थापनमा थानाबजारमा सम्पन्न तालिममा १७ जना महिलाको सक्रिय सहभागिता रहेको थियो।

समापन समारोहमा प्रमुख अतिथिको रूपमा उपस्थित थाहा नगरपालिकाका नगरप्रमुख विष्णु बिष्टले वातावरणमैत्री झोलाको बजारीकरणमा नगरपालिका सहयोगी भूमिका खेल्ने बताए। उनले प्लास्टिकजन्य पदार्थको विकल्पको रूपमा यस्ता झोलाको प्रयोगलाई प्रवर्द्धन गर्नु आवश्यक रहेको उल्लेख गर्दै, यस्तो सीपले महिला स्वरोजगारमा टेवा पुर्‍याउने विश्वास व्यक्त गरे।

नगरप्रमुख बिष्टले प्रदेश सरकार, स्थानीय सरकार र उद्योग वाणिज्य संघबीचको सहकार्यबाट सीपमूलक तालिमहरु भए तापनि अपेक्षित दक्ष जनशक्ति उत्पादनमा कमी देखिएको टिप्पणी गर्दै अब व्यवहारिक कार्यान्वयनमा ध्यान दिनुपर्ने धारणा राखे। साथै, उनले वातावरणीय सरसफाइ र मानवस्वास्थ्यको दृष्टिले प्लास्टिकको विकल्पमा यस्ता झोला प्रभावकारी हुने बताए।

वडा नं. ३ का अध्यक्ष तथा थाहा नगरपालिका आर्थिक विकास समिति संयोजक हिरेन्द्रकुमार रायमाझीले सिकिएको सीप व्यवहारमा उतार्न आग्रह गर्दै स्वच्छ र समृद्ध नगर निर्माणमा सबैको सक्रियता आवश्यक रहेको बताए।

प्रशिक्षार्थीहरूको तर्फबाट बोल्दै नानू बिकले तालिमबाट प्राप्त सीपलाई व्यवहारमा प्रयोग गर्न तयार रहेको बताउँदै आगामी दिनमा अझ गहिरो र प्राविधिक सीप सिकाउने अवसरको माग गरिन्।

कार्यक्रममा थाहा नगर उद्योग वाणिज्य संघका अध्यक्ष पुरुषोत्तम ढकालले संघले सामाजिक उत्तरदायित्व अन्तर्गत यस्ता कार्यक्रमहरूलाई प्राथमिकतामा राख्दै आएको जानकारी गराए।

तालिम समापन समारोह उद्योग तथा वाणिज्य कार्यालय हेटौंडाका प्रमुख रामप्रसाद भुषालको अध्यक्षतामा सम्पन्न भएको थियो। कार्यक्रममा नेपाल उद्योग वाणिज्य महासंघ बागमती प्रदेशका कोषाध्यक्ष कविराज खत्री, थाहा नगर उद्योग वाणिज्य संघका वरिष्ठ उपाध्यक्ष शम्भु सिंह कार्की, प्रशिक्षक आरती श्रेष्ठ, र उद्यम विकास सहजकर्ता लेखमान राउतको समेत उपस्थिति रहेको थियो।
 तालिमले थाहा नगरपालिकामा वातावरण संरक्षण र महिला सशक्तिकरणमा सकारात्मक प्रभाव पार्ने अपेक्षा गरिएको छ।