थाहा नगरपालिकाको एउटै वडामा ७० जनालाई कोरोना

मकवानपुरको थाहा नगरपालिकामा एउटै वडामा ७० जना व्यक्तिलाई कोरोना भाइरस सङ्क्रमण पुष्टि भएको छ । थाहा नगरपालिका वडा नम्बर ३ मा पिसिआर र एन्टिजेन परीक्षण गर्दा दुई साताभित्र ७० जनामा कोरोना देखिएको थाहा नगरपालिकाले जनाएको छ । 
थाहा नगरपालिकाभित्र अहिले कोरोनाबाट कूल सङ्क्रमित सङ्ख्या २०० जना रहेका छन् । नगरको एउटै वडामा ३५ प्रतिशत  कोरोना सङ्क्रमित देखिनुले चुनौति र जोखिम दुबै बढेको थाहा नगरपालिकाका स्वास्थ्य शाखा प्रमुख मेघराज बलामीले जानकारी दिनुभयो । 
थाहा–३ मा कोरोनाको सङ्क्रमण दर पनि उच्च रहेको छ । यहाँ कोरोनाको दोस्रो लहरको क्रममा १०२ जनामा परीक्षण गरिएकोमा ७० जनामा सङ्क्रमण देखिएको र सङ्क्रमण दर ६६ प्रतिशत रहेको नगरपालिकाका सूचना अधिकारी सुरजकुमार भुजेलले जानकारी दिनुभयो । सङ्क्रमित हुनेमा स्वास्थ्यकर्मीसमेत रहेका छन् ।
विवाह भोज–भत्तेरको जमघट र अन्य सामुहिक गतिविधिका कारण थाहा नगरपालिका–३ मा कोरोना सङ्क्रमण फैलिएको ‘कन्ट्याक्ट ट्रेसिङ’ बाट देखिएको प्राथमिक स्वास्थ्य केन्द्र पालुङका डाक्टर रिकेस कार्कीले बताउनुभयो । थाहा–३ मा कोरोना सङ्क्रमितमध्ये १ जनाको मृत्यु भएको छ भने दुई जना निको भएका छन् । त्यस्तै ६७ जना घर आइसोलेसनमा रहेको नगरपालिकाले जनाएको छ ।