थाहामा मनाइयो राष्ट्रिय क्षयरोग दिवस

आज मार्च २४ तारिख । हरेक बर्ष आजकै दिन संसारभर विभिन्न कार्यक्रम आयोजना गरी अन्तरराष्ट्रिय क्षयरोग दिवस मनाइन्छ । क्षयरोग रोग विरुद्ध जनचेतना जगाउने, सरल र सहज रुपमा उपचारको प्रबन्ध गर्ने, गराउने उद्देश्यका साथ यो दिवस मनाउने गरिएको छ ।

दिवसको यस वर्षको नारा ‘हो, हामी क्षयरोग अन्त्य गर्न सक्छौं । लगानीको प्रतिबद्धता र सेवा प्रवाहको सुनिश्चतता, आजको आवश्यकता’ भन्ने तय गरिएको छ । यस दिवसले क्षयरोग महामारीको अन्त्यका लागि गरिएका प्रतिबद्धता, प्रयास, तथा उपलब्धीलाई सम्झिने अवसर समेत प्रदान गरेको छ ।

राष्ट्रिय क्षयरोग  दिवसका अवसरमा थाहा नगरपालिकाले पनि जनचेतनामूलक कार्यक्रमको आयोजना गरेको छ । 
थाहा नगरपालिकाको आयोजनामा दिवसको अवसरमा वडा न ९ चित्लाङमा र्याली सहित सचेतनामुलक सडक नाटक प्रदर्शन सहित दिवस मनाएको हो।
सान्भी फिल्मस संगको सहकार्यमा थाहा नगरपालिकाले नगरपालिकाको चित्लाङ र वडा न ७ को डाँडाबासमा सचेततामुलक सडक नाटक प्रदर्शन गरेको थाहा नगरपालिका क्षयरोग फोकल पर्सन प्रधुम्न हमालले जानकारी दिए।
चित्लाङमा भएको र्यालीमा बन बिज्ञान बिध्यालयमा अध्यनरत विद्यार्थी तथा चित्लाङ कराते डोजोका खेलाडिहरु तथा अभिनेता सलोन बस्नेत,चलचित्र निर्देशक सुरेश न्यौपाने समेतको सहभागिता रहेको थियो।

उक्त रोगका कारण नेपालमा हजारौँ मानिस प्रभावित भइरहेका छन् । विश्वव्यापी रुपमा क्षयरोग अन्त्यका लागि गरिएका हाम्रो साझा तथा सामूहिक संकल्पमा थाहा नगर कटिबद्ध रहेको नगर प्रमुख बिष्णु बिष्टले बताए ।