डाँडाबासमा निःशुल्क स्वास्थ्य शिविर सम्पन्न, २८६ जना महिलाले गराए उपचार

११३ औं अन्तर्राष्ट्रिय नारी दिवसको अवसरमा वीङ  युथको आयोजना तथा थाहा नगरपालिकाको सहयोगमा सञ्चालित दुई दिने निःशुल्क महिला स्वास्थ्य शिविर सम्पन्न भएको छ । 

थाहा नगरपालिका वडा नं. ७, ८ र कैलाश गाउँपालिकाका महिलाहरुलाई लक्षित गरी थाहा–७ स्थित डाँडाबासको श्री सुन्दरीदेवी मा.वि. मा संचालन गरिएको शिविरबाट २८६ जना महिलाहरुको उपचार गरिएको संस्थाका कोषाध्यक्ष डा. गगन कार्कीले बताउनु भयो । 

शिविरको पहिलो दिन फागुन २४ गते ७८ जना महिलाहरुको भिडियो एक्सरे, २५ जनाको पाठेघरको मुखको क्यान्सर जाँच (एल.बी.सी.) र २ जना पाठेघर खसेको महिलामा रिङ पेसरी राखी उपचार गरिएको डा. कार्कीले बताउनु भयो । सो शिविरमा आएका विरामीहरुमध्ये दुई जनाको पाठेघरको शल्यक्रियाका लागि काठमाडौं मोडल अस्पताल पठाइएको र उनीहरुको निःशुल्क उपचार गरिने समेत उहाँले बताउनु भयो । 

यसै गरी शिविरको दोस्रो दिन फागुन २५ गते २०० जना महिलाहरुको भिडियो एक्सरे सहितको उपचार, ३० देखि ५० वर्ष उमेरका ३७ जना महिलाको पाठेघरको मुखको क्यान्सर जाँच (एल.बी.सी.) गरिएको थियो । शिविरमा ५० वर्ष उमेरभन्दा माथिका ४० प्रतिशत महिलाहरुको उपचार गरिएको थियो । शिविरमा विरामीहरुलाई निःशुल्क औषधि समेत वितरण गरिएको थियो । 

आर्थिक रुपमा विपन्न वर्गका महिलाहरुका लागि शिविरले प्रत्यक्ष लाभ दिएकोप्रति थाहा नगरपालिकाका उपमेयर भरत गोपालीले खुसी व्यक्त गर्नुभएको छ । यस्तो शिविरहरु थाहा नगरपालिकाको प्रत्येक वडागत रुपमा हुनुपर्ने र  त्यसका लागि थाहा नगरपालिकाको कार्यालय सकारात्मक रहेको गोपालीले बताउनुभयो । 

शिविरको दोस्रो दिन थाहा नगरपालिका सामाजिक विकास शाखाका प्रमुख अनिल लामिछाने, सूचना अधिकारी सुरजकुमार भुजेल र थाहा नगरपालिका वडा नंं ७ का वडा अध्यक्ष शिवराज थिङको उपस्थिति रहेको थियो ।